Биһиги биир дойдулаахпыт, Москва куоракка 9-с кылааска үөрэнэр 16 саастаах Зарина Борисова бу күннэргэ Арассыыйа успуордун миниистирэ Олег Матыцин бирикээһинэн художественнай гимнастикаҕа Арассыыйа успуордун маастарын аатын ылла.
Арассыыйа художественнай гимнастиката Аан дойдуга, олимпийскай оонньууларга бастакы күөҥҥэ сылдьар. Онон бу көрүҥҥэ ханнык баҕарар таһымнаах күрэхтэһиилэргэ илин-кэлин былдьаһыы олус улахан.
Зарина 4 сааһыттан “Чолбон” бассыайыҥҥа биллиилээх гимнастка Виолетта Ивановаҕа дьарыктаммыт. Манна киниэхэ төрөппүттэрин сэргэ эбэтэ, эһэтэ өйөөн-өйдөөн тирэх буолан көмөлөспүттэр.
Өрөспүүбүлүкэҕэ успуорт бу көрүҥүн күүскэ өйөөн элбэх күрэхтэһии ыытыллар. Манна Зарина ситиһиилээхтик кыттан мэлдьи бастыырын иһин төрөппүттэрэ 8 сааһыгар дойду тэбэр сүрэҕэр Москваҕа ыыппыттар. Москваҕа Ирина Винер-Усманова салайааччылаах Художественнай гимнастика киинигэр дойду кыайыыга дьулуурдаах, тулуурдаах бастыҥ спортсменкалара иитиллэллэр. Манна Саха сириттэн төрдүөлэр: Виолетта Алексеева, Дарья Христофорова, Алекса Николаева уонна Зарина Борисова. Кини Уһук Илин, Саха сирин сүүмэрдэммит хамаандаларын чилиэнэ, билигин Москваҕа тириэньэр, успуорт маастара Валерия Шкред салалтатынан дьарыктанар. Кинилэр нэдиэлэҕэ 6 күн биэстии чаас эрчиллэллэр.
Саха Өрөспүүбүлүкэтин художественнай гимнастикатын федерациятын бэрэсидьиэнэ Людмила Николаева этэринэн, художественнай гимнастика икки көрүҥҥэ арахсар: бөлөҕүнэн уонна биирдиилээн. Ааспыт сылга Владивостокка ыытыллыбыт “Азия оҕолоро” норуоттар икки ардыларынааҕы спортивнай оонньууларга Зарина Борисова бастакытын кыттан 7-с миэстэ буолан, бу успуорка 8 бастыҥнарга ааттаммыта. Обруч, мээчик, булава, лиэнтэ көмөлөрүнэн акробатика, кэрэтик хамсаныы, имигэс үҥкүү, уустук элэмиэннэри толоруу көрүҥнэриттэн кыыс лиэнтэнэн үҥкүүлүүрүн ордорор. Маны барытын сорохтор эрэ тулуурдаахтык ааһаллар. Манна тириэньэрин, төрөппүттэрин өйөбүллэринэн гимнастка бэйэтигэр күүскэ үлэлээн бастыҥнар кэккэлэригэр киирбит.
Биир дойдулаахпытын Зарина Борисованы, кини төрөппүттэрин, эһэтин, эбэтин гимнастика курдук кэрэ уонна уустук көрүҥҥэ үрдүк ситиһиитинэн итиитик-истиҥник эҕэрдэлиибит!
Марелла Баишева.