Кулун тутар 30 күнүгэр Майа сэлиэнньэтин Ураһалаах алааһыгар үгэскэ кубулуйбут Иннокентий Иннокентьевич Новгородов кэриэһигэр улуустааҕы «Байанай» күрэҕэ буолан ааста.
Барыта түөрт хамаанда кэлэн кыттыыны ылла. Алтан, Мэлдьэхси нэһилиэктэрэ, Майа уонна Майатааҕы баһаарынай чаас хамаандаларын туруоран, төһө бэлэмнээхтэрин, сатабылларын көрдөрдүлэр. Күрэхтэһии кыттыылаахтарын улуус баһылыга Дмитрий Тихонов, Ил Түмэн дьокутаата Андрей Находкин уонна сүрүн судьуйа Дмитрий Сидоров эҕэрдэлээтилэр, ким түмсүүлээх, үчүгэй бэлэмнээх – ол кыайарыгар баҕардылар.
Тыҥааһыннаах киирсии кэнниттэн Майатааҕы баһаарынай чаас хамаандата күрэхтэһии муҥутуур кыайыылааҕынан буолла. Иккис миэстэҕэ Мэлдьэхси хамаандата таҕыста. Үһүс миэстэни Майа сэлиэнньэтин хамаандата ылла. Уонна төрдүс Алтан нэһилиэгин хамаандата буолла. Миэстэлэспит хамаандалар 30, 20 уонна 10 тыһыынча солкуобайдаах сертификатынан наҕараадаланнылар.
Биирдиилээн дьоҥҥо: Сааны түргэнник ыһыыга уонна хомуйууга: 1 миэстэ — Радомир Никитин (Майа), 2 миэстэ — Андрей Пивоваров (баһаарынай чаас), 3 миэстэ — Иван Местников (Өлөчөй), 4 миэстэ — Денис Колесов (Мэлдьэхси). Булт быраабылатын билиигэ: 1 миэстэ — Вячеслав Окороков (Мэлдьэхси), 2 миэстэ — Евгений Пинигин (Өлөчөй), 3 миэстэ — Гаврил Сидоров (баһаарынай чаас), 4 миэстэ — Юлиан Слободчиков (Майа). Ойбон алларыытыгар: 1 миэстэ — Андрей Пивоваров, Борис Романов (баһаарынай чаас), 2 миэстэ — Вячеслав Окороков, Семен Герасимов (Мэлдьэхси), 3 миэстэ — Ян Новгородов, Иннокентий Нестеров (Майа), 4 миэстэ — Валерий Герасимов, Андрей Петров (Өлөчөй). «Түргэн чэй» түһүмэххэ: 1 миэстэ — Тит Слободчиков, Михаил Шипошин (баһаарынай чаас), 2 миэстэ — Руслан Сокольников, Аркадий Винокуров (Мэлдьэхси), 3 миэстэ — Владимир Степанов, Руслан Яковлев (Майа), 4 миэстэ — Михаил Назаров, Дмитрий Билюкин (Өлөчөй).
Эрэллээхтик кыайбыт уолаттарбытыгар, бары кыттааччыларга уонна тэрийээччилэргэ эҕэрдэ буолуохтун, Байанайгыт куруук тосхойо турдун. Кыайыылаах хамаанда салгыы өрөспүүбүлүкэтээҕи күрэххэ улууспут чиэһин көмүскүөҕэ. Уолаттарбытыгар үрдүк ситиһиилэри баҕарабыт!
«Байанай-2024» күрэх быйылгы сонун сүүрээнинэн Илин уонна Арҕаа-Сибиир булчут боруодалаах ыттарын сыаналыыр быыстапката буолла. Быыстапкаҕа дьон-сэргэ хото кэлэн, барыта 32 ыт кыттыыны ылла.
Ыттары өрөспүүбүлүкэттэн Роберт Романович Константинов диэн эксперт кэлэн судьуйалаата. Боруодаларынан араартаан, ыт тас көрүҥүн сайдыытын, түүтүн дьүһүнүн, тииһин эрээтин уонна онтон да атын ирдэбиллэргэ эппиэттиирин көрөн сыаналаатылар.
Арҕаа-Сибиир лайка боруодалаах ыттарга сэттэ ыт кыттыбытыттан: Бастакы миэстэ — 3 саастаах Белла диэн ааттаах ыт. Хаһаайына — Семен Гоголев. Иккис миэстэ — 1 саастаах Белла диэн ааттаах ыт. Хаһаайына — Афанасий Филиппов. Үһүс миэстэ — 5 саастаах Кустук диэн ааттаах ыт. Хаһаайына — Ян Мохначевскай.
Илин-Сибиир лайка боруодалаахтарга 25 ыт кыттан, түмүк маннык буолла: Бастакы миэстэ — 2 саастаах Аргыс диэн ааттаах ыт. Хаһаайына — Афанасий Филиппов. Иккис миэстэ — 2 саастаах Баппат диэн ааттаах ыт. Хаһаайына — Афанасий Шамаев. Үһүс миэстэ — 4 саастаах Черный диэн ааттаах ыт. Хаһаайына — Михаил Черкашин.
Муҥутуур кыайыылааҕынан Аргыс диэн ыт буолла, хаһаайына — Афанасий Филиппов. Оттон тыһы ыттарга Белла диэн ааттаах ыт ааттанна. Хаһаайына — Семен Гоголев.
Миэстэлиспиттэр уу харчынан уонна сыаналаах бириистэринэн наҕараадаланнылар. Тэрээһиҥҥэ күүс-көмө буолбут спонсордарга, судьуйаларга, сүрүн бирииһи туруорбут бөрөһүттэр түмсүүлэригэр истиҥ махтал буолуохтун!
Булчут хааннаах, удьуор төрүттээх ыттары иитиигэ, харыстаан көрүүгэ-истиигэ көҕүлүүр, кэнчээри ыччакка саха киһитэ айылҕаны кытта ыкса ситимнээҕин тиэрдэр сыаллаах тэрээһин дьон-сэргэ сэҥээриитин ылла. Кырдьыга да, былыр-былыргыттан киһи доҕорунан ааттаммыт булчут ыт барахсан хаһаайынын кытта сиргэ-уокка, булка-алка сылдьыһан кэллэҕэ.
Мэҥэ Хаҥалас улууһун дьаһалтатын пресс-сулууспата.
