Анал байыаннай дьайыы байыастарыгар оҥоһуллар көмө уҕараабат. Эр санаалаах буойуттарбыт дойдуларыгар этэҥҥэ эргиллэн кэлэллэригэр майалар сүрэхтэрин сылааһын иҥэрбит оҥоһуктарын ыыталлар.
Бүгүн, ахсынньы 5 күнүгэр, Мария Лукина салайааччылаах “Түмэн” уопсастыбаннай холбоһук иистэнньэҥнэрэ дойду көмүскэлигэр сылдьар биир дойдулаахтарыгар таҥас тигэн, быйыл күһүн иккис баһыылкаларын ыыттылар. Кинилэр буойуннарга кэлэн иһэр Саҥа Дьыл тыынын иҥэрэн, фетр матырыйаалтан оҥоһуллубут, оҕуруонан киэргэтиллибит харыйа оонньуурдарын укпуттар. Быйылгы сылтан «түмэннэр» икки сиринэн үлэлииллэр. Федора Наумова салайар ииһин сыаҕа “Саха сирэ эйигин кытта” уонна Ариадна Филиппова “Илии сылааһа” өрөспүүбүлүкэтээҕи сыаҕы кытта үлэлэһэллэр.
Бу күннэргэ Ариадна Филиппова “Илии сылааһа” өрөспүүбүлүкэтээҕи сыахха 7 сылаас кууркалары, 8 флис толстовкалары, 2 паара плащевай матырыйаалтан, 1 хлопоктан сылаас көстүүмнэри, 6 флис бэргэһэ, 1 снуд тигэн ыыппыта.
Антонина Петрова салайар ииһин сыаҕар Лена Петрова, Екатерина Шарина, Мария Федорова, Вера Терякова иистэнэллэр. Драмкуруһуоктан Марфа Алексеева салайааччылаах Александра Рожина, Ольга Аринкина, оскуола оҕолоро көмөлөспүттэр. Антонина Николаевна таҥастары кырыйан биэрэр. Манна 7 көстүүм, 12 ыстаан, 23 бэргэһэ, 28 повязка, 55 харыйа оонньуурдарын, Сыымахтан Зоя Захарова салайааччылаах уопсастыбаннай түмсүү чилиэннэрэ 23 устуука сылгы сиэлиттэн уллуҥах (стелька), 30 саа уоһун хаатын тикпиттэр.
Евдокия Семенова салайар бөлөҕө биир куул саһыарар сиэккэ, ол эбэтэр, 15 кв миэтэрэ уонна 9 устуука бэргэһэ таһынан кэтиллэр кааска оҥорон биэрдилэр. Манна Заредина Сосина, Александра Дашеева, Хаарчаана Иванова, Татьяна Аргунова, Анастасия Сыромятникова, Татьяна Гаврильева күннэтэ тохтообокко сылдьаллар.
Таһаҕаһы “Түмэн” сүбэтин чилиэнэ Степан Копырин бэйэтин массыынатынан тирэх пууннар аадырыстарыгар тиэрдэр соруктаах Дьокуускай куоракка тиэнэн барда.
Марелла Баишева.
