Култуура уонна успуорт эстэпиэтэтэ
Алена ДОКТОРОВА.
Улууспутугар үтүө үгэскэ кубулуйан сыллата ыытыллар «В.К.Степанов аатынан Култуура уонна успуорт эстэпиэтэтэ» бэстибээл быйыл Манчаары Баһылай төрөөбүтэ 200, Мэҥэ Хаҥалас улууһа төрүттэммитэ 95, Улуу Кыайыы 80 уонна Майа сэлиэнньэтигэр Төрүччү сылларыгар ананан «Түмсүөҕүҥ, сомоҕолоһуоҕуҥ ‒ эйэлээх олоҕу тутуоҕуҥ!» диэн девизтээх нэһилиэктэринэн үс уонна Майа сэлиэнньэтигэр биэс бөлөҕүнэн үрдүк тэрээһиннээхтик ыытылынна.
Эстэпиэтэ эр дьон оһуокайын, успуорка күрэхтэһиилэри, «Ходулов‒Fest-2025» испиктээктэри уонна уус-уран самодеятельность театрализованнай кэнсиэрин көрүүлэри ‒ уопсайа түөрт көрүҥү хапта.
Майа сэлиэнньэтигэр тэрилтэлэр икки ардыларыгар эстэпиэтэ олунньу 9 күнүттэн кулун тутар 1 күннэригэр диэри көхтөөхтүк ыытылынна. Күөн күрэскэ түөрт көрүҥҥэ барыта 1052 киһи кытынна. Маныаха бөлөхтөрүнэн көрүҥ ахсын тэрийэр үлэҕэ сүүрбүт-көппүт дьону эптэххэ, хабыллыбыт дьон ахсаана итинтэн лаппа элбэҕэ сэрэйиллэр.
Эр дьон оһуокайыгар Ф.Г.Охлопков аатынан орто оскуола сүрүннүүр бөлөҕө бастакы, В.П.Ларионов аатынан орто оскуола сүрүннүүр бөлөҕө иккис, «Кэнчээри» уһуйаан сүрүннүүр бөлөҕө үһүс, И.Г.Тимофеев аатынан лиссиэй сүрүннүүр бөлөҕө төрдүс, улуустааҕы киин балыыһа сүрүннүүр бөлөҕө бэһис миэстэлэри ыллылар.
Успуот күрэхтэһиилэригэр улуустааҕы киин балыыһа сүрүннүүр бөлөҕө бастакы, «Кэнчээри» уһуйаан сүрүннүүр бөлөҕө иккис, Ф.Г.Охлопков аатынан орто оскуола сүрүннүүр бөлөҕө үһүс, В.П.Ларионов аатынан орто оскуола сүрүннүүр бөлөҕө төрдүс, И.Г.Тимофеев аатынан лиссиэй сүрүннүүр бөлөҕө бэһис миэстэлэннилэр.
«Ходулов‒Fest-2025» испиктээктэри көрүүгэ «Кэнчээри» уһуйаан сүрүннүүр бөлөҕө бастакы, И.Г.Тимофеев аатынан лиссиэй сүрүннүүр бөлөҕө иккис, В.П.Ларионов аатынан орто оскуола сүрүннүүр бөлөҕө үһүс, Ф.Г.Охлопков аатынан орто оскуола сүрүннүүр бөлөҕө төрдүс, киин балыыһа сүрүннүүр бөлөҕө бэһис буоллулар.
Уус-уран самодеятельность кэнсиэрин көрүүгэ И.Г.Тимофеев аатынан лиссиэй сүрүннүүр бөлөҕө бастакы, В.П.Ларионов аатынан орто оскуола сүрүннүүр бөлөҕө иккис, Ф.Г.Охлопков аатынан орто оскуола сүрүннүүр бөлөҕө үһүс, киин балыыһа сүрүннүүр бөлөҕө төрдүс, «Кэнчээри» уһуйаан сүрүннүүр бөлөҕө бэһис миэстэлэри үллэһиннилэр. Д.Ф.Ходулов аатынан Норуот айымньытын дьиэтин дириэктэрэ Екатерина Ефремова бэрэссэдээтэллээх култуура эйгэтигэр уопуттаах исписэлиистэртэн састааптаах дьүүллүүр сүбэ үлэлээтэ.
Уопсай түмүккэ түөрт көрүҥүнэн үс бөлөх бары 11 баалы ыллылар. Эстэпиэтэ балаһыанньатыгар олоҕуран, тэҥнэһии тахсар түгэнигэр, уус-уран самодеятельноска үрдүк баалы ылбыт бөлөх кыайыылаах тахсар. Онон В.П.Ларионов аатынан орто оскуола сүрүннүүр бөлөҕө быйылгы эстэпиэтэ кыайыылааҕынан ааттанна. Кинилэргэ «Майа сэлиэнньэтэ» тыа сирин түөлбэтэ олохтообут 100 тыһ.солк. суумалаах сэртипикээтэ туттарылынна. Иккис миэстэни ылбыт Ф.Г.Охлопков аатынан орто оскуола сүрүннүүр бөлөҕө 80 тыһ.солк., үһүс миэстэ буолбут «Кэнчээри» уһуйаан сүрүннүүр бөлөҕө 60 тыһ.солк. бэлиэтэннилэр. Төрдүс буолбут И.Г.Тимофеев аатынан лиссиэй сүрүннүүр бөлөҕө 40 тыһ.солк, бэһис миэстэлээх киин балыыһа сүрүннүүр бөлөҕө 20 тыһ.солк. сэртипикээттэри туттулар.
‒ Мэҥэ Хаҥалас улууһугар култуура уонна успуорт эйгэлэрэ өссө үрдүк чыпчаалга, таһымҥа тахсалларыгар дьоммут-сэргэбит эстэпиэтэҕэ көхтөөхтүк кыттаҥҥыт төһүү күүс буоларгытыгар биир дойдулаахтарбар истиҥник махтанабын. Быйылгы сылга эр дьон оһуокайын көрүүгэ Дьокуускайтан өрөспүүбүлүкэбит оһуокайы бастыҥ таһаарааччыларын, биллэр этээччилэрин ыҥыран дьүүллүүр сүбэҕэ үлэлэттибит. Бу, биллэн турар, эр дьон оһуокайын өссө үрдүк таһымҥа тахсарыгар олук уурда. Ол түмүгэр Дьокуускайга Саха цииркэтин уораҕайыгар киэн туттар биир дойдулаахпыт Василий Винокуров‒Кыталык Баһылай көҕүлээн тэрийэр үтүө үгэскэ кубулуйбут «Сүр көтөҕүү» бырайыагар эстэпиэтэҕэ кыайыылаах тахсыбыт Ф.Г.Охлопков аатынан орто оскуола сүрүннүүр бөлөҕүн оһуокайдьыттара кыттан бастыҥ көстүүлээх, ырыалаах-тойуктаах оһуокайын көрдөрдүлэр. Эстэпиэтэ тэрээһинигэр тэрилтэлэр түмсэммит, бэйэ-бэйэбитин кытары билсэммит, ыал-ыалынан кыттыһаммыт улахан түһүлгэни түстүүрбүтүн умнуо суохтаахпыт. Эһиилги эстэпиэтэҕэ көрсүөххэ диэри!‒ диэтэ эстэпиэтэҕэ кыттааччыларыгар, көрөөччүлэригэр туһаайан «Майа сэлиэнньэтэ» тыа сирин түөлбэтин баһылыга Алексей Неустроев.
Эстэпиэтэ дьону түмэр, сомоҕолуур күүһэ инникитин да өссө сайдан, тэнийэн, күүһүрэн иһиэхтин!
