Майа сэлиэнньэтин суоллара төрдүттэн оҥоһуллубатахтара өр буолла. Эһиилги сылга сэлиэнньэ киин, сүрүн суолларын оҥоруу былааҥҥа турар.
Бүгүн, алтынньы 11 күнүгэр, “Майа сэлиэнньэтэ” тыа сирин түөлбэтин баһылыга Алексей Неустроев уонна кинини олох-дьаһах, хомунаалынай хаһаайыстыба боппуруостарыгар, сиргэ сыһыаннаһыыларга солбуйааччы Март Андреев Дьокуускайга Тутуу эйгэтигэр сыананы төрүттээһиҥҥэ автономнай тэрилтэ салайааччытын, биир дойдулаахпытын Геннадий Гермогеновы кытта көрүстүлэр.
Сэлиэнньэ суолларын оҥоруу үбүлээһинин эһиилги 2024 сылга Өрөспүүбүлүкэтээҕи суол-иис пуондатыттан көрдөрөргө бэлэмнэнэн, быйылгы сылга бырайыак уонна симиэтэ докумуона оҥоһуллан бүттэ. Салгыы симиэтэ эспэртиисэтин ааһыан наада. Ол эспэртиисэни оҥоруу боппуруостарын биир дойдулаахпытын, Тутуу эйгэтигэр сыананы төрүттээһиҥҥэ автономнай тэрилтэ салайааччытын Геннадий Ревович Гермогеновы кытта көрсөн дьүүллэстилэр.
Былааҥҥа баар 7 сүрүн, элбэх сырыылаах суолларбыт – Майинскай, Советскай, Алданскай, Комсомольскай, Сыроватскай, Степанов, Самсонов ааттарынан уулуссалары оҥоруу бырайыага этэҥҥэ бэрэбиэркэни ааһыа диэн эрэнэ, хамыыһыйа түмүгүн күүтэбит.