Оҕолорго үлэ киниискэтэ арыллан, ыстаас ааҕыллан барар

Улуустааҕы үөрэтэр-оҥорон таһаарар эбии үөрэхтээһин уонна нэһилиэнньэ дьарыктаах буолуутун киинннэрэ «Улаатан эрэр оҕолору үлэнэн хааччыйыы» бырагырааманан быйыл 3-с сылын үлэлииллэр.

Бу бырагыраама көмөтүнэн оҕолор талбыт идэлэринэн эрдэттэн үлэҕэ уһуйуллаллар, хамнас үлэттэн кэлэрин өйдүү үөрэнэллэр. Бырагыраамаҕа 14-тэн үөһээ саастаах оскуола оҕолоро кытталлар. Үөрэнээччилэри бэс ыйын 10 күнүттэн 3 хайысханан анал идэҕэ туһаайыллар үлэлэргэ ылбыттара.

Үөрэтэр-оҥорон таһаарар киин дириэктэрин үөрэх чааһыгар солбуйааччы Мария Борисова салалтатынан Майатааҕы И.Г.Тимофеев аатынан лиссиэй үөрэнээччилэрэ Андриана Зыкова, Алеся Тимофеева, Таисия Трофимова «Докумуону толоруу» диэн хайысхаҕа уһуйуллаллар.

Киин «Иистэнньэҥ үөрэнээччитэ» салаатыгар бырактыкаан Василина Николаева үөрэтиитинэн лиссиэй үөрэнээччитэ Алико Скрябина, киэһээҥҥи оскуола үөрэнээччитэ Кристина Березкина орон таҥаһын тигэллэр.

Уолаттар –  Ф.Г.Охлопков аатынан Майа орто оскуолатыттан Ньургун Иванов, лиссиэйтэн Егор Николаев, Владислав Семенов, Никита Тимофеев, киэһээҥҥи оскуолаттан Иван Готовцев киин маастар-столярын Василий Пономарев, бырактыкаан Василий Федоров салалталарынан столяр идэтин баһылыырга кыһаллаллар. Кинилэр улуус оскуолаларын сакаастарынан үөрэх тэрилин, кэбиниэттэргэ аналлаах миэбэли оҥороллор.

Оҕолор сайыҥҥы сынньалаҥ бириэмэтигэр 20 күн устата түөртүү чаас үлэлээн, хас биирдиилэрэ 18000-лыы солкуобай хамнас аахсыахтара. Маныаха кинилэргэ номнуо үлэ киниискэтэ арыллан, үлэ ыстааһа ааҕыллан барарын туһунан бэлиэтиибит. Хамнастарын үөрэх тэрилин, таҥаһын-сабын ылыыга, сорохтор тус сыалга туттууга бэйэбит сэмэй кылааппытын киллэриэхпит этэ диэн баҕалаахтар.

«Сайыҥҥы кэмҥэ мээнэ сылдьыбакка, үлэлиирбит, бэйэбит илиибитинэн тутан-хабан оҥорон таһаарарбыт, хамнас ыларбыт олус үчүгэй уонна туһалаах эбит!» – диэн үөрэнээччилэр бырайыак тэрийээччилэригэр махтаналлар.

 

Иван Лукин.