Олунньу 14 күнүгэр СӨ экэниэмикэҕэ миниистирэ Петр Попов салалтатынан Бырабыыталыстыбатын отчуоттуур бөлөҕө Майаҕа туруорда.
Суругунан, тылынан да бэрт үгүс сытыы ис хоһоонноох ыйытыылар, этиилэр киирдилэр. Бастатан туран, сыана, уматык күн-түүн ыаратылла турара таарылынна. Аҥаардас биэнсийэҕэ олорор нэһилиэнньэ араҥата ханна да буоларын курдук санаатын кыйаханыылаахтык эттэ-саҥарда.
Байыаннай дьайыыга сыһыаннаах үгүс боппуруоһу үлэ бэтэрээннэрэ Татьяна Артемьева, Семен Стручков, Ариадна Филиппова, байыаннай дьайыы кыттыылааҕа Эдуард Яковлев о.д.а. биэрдилэр. Сураҕа суох сүппүттэри көрдүүргэ хайдах үлэлииллэрин, Саха сиригэр байыаннай госпиталь суоҕа эрэйи үөскэппитин, хамыыһыйа барар сыалтан соҕуруу сэттэтэ тиэстэр кыһалҕа үөскээбитин, байыаннай дьайыы кыттыылааҕар уһаайбаны биэрии бэрээдэгин, ону таһынан своларга биэс оҕолооҕунан дьиэҕэ тиксиини түргэтэтэр балаһыанньаны, буойуннарга тыа хаһаайыстыбатыгар граны биэрии тула ыйыталастылар. Байыаннай дьайыы кыттыылааҕа хамыыһыйа барарыгар медтэрилтэ өртүттэн мөлтөх сыһыаны көрсүбүтүн, «Абалаах» санаторий материальнай базатын тупсарар уолдьаспытын бэлиэтээтэ.
Тыа хаһаайыстыбатыгар ыччаты тардыыга эрдэ биэнсийэҕэ тахсыыны олоххо киллэрэргэ. В.П.Ларионов аатынан уулусса быстар мөлтөх туруктааҕа, аспаалланыан наадата ахтылынна. Кузьма Бурнашев саахар ыарыытыттан эмтэнээччилэр балыыһалара Дьокуускайга тоҕо сыллата көһө сылдьара, дьиэтэ-уота быһаарыллара уолдьаспытын, Тараҕай нэһилиэгэр кулууп дьиэтэ наадатын туруоруста. Анатолий Чичахов салалта кыра-хара дьоҥҥо сыһыана тупсуохтааҕын туһунан, үөрэх-иитии, култуура боппуруостарыгар санааларын үллэһиннэ.
Үөрэх боппуруостарыгар биир кэлим эксээмэн олох туһата суоҕа, сахалыы учебниктар таһымнара, улуус, нэһилиэк устуоруйатын туһунан биридимиэт оскуолаҕа хайаан да баар буолуохтааҕа таарылыннылар.
Олох-дьаһах эйгэтигэр тыа сиригэр сытан эмтэнэр балыыһаны аһар булгуччулааҕын, хаарбах дьиэни ылыы инникитин төлөбүрдээх буолуута, дьахтары төрөтүү тоҕо барыта Дьокуускайга буолара, Бүлүү Балаҕаччытыгар гаас ситимэ хаһан тардыллара, Нуораҕанаҕа, Майа Маамыкааныгар электроуот ситимэ хаһан тупсарыллара, кырдьаҕастарга дьиэ өрөмүөнүгэр үгүөрү үп-харчы көрүллүүтүн, Майа илин өртүгэр аптека, укуолу биэрэр пуун аһыллара наадатын, ыраах сиргэ таксинан тиэстэр ыараханын, Майаҕа гаас оһох сапчааһын араас көрүҥүттэн атыылыыр маҕаһыын аһыллыытын ыйыттылар.
Майалар тыл этиилэригэр лиссиэй саҥа дьиэтэ сотору кэминэн тутуллуутун, успуорт эбийиэктэр саҥардыллаллара уолдаспытын, Ф.Г.Охлопков аатынан оскуола иннигэр светофор туруоруллара, бэтэринээр хамнаһа, «Земскэй биэлсэр» төлөбүрэ үрдэтиллэрэ наадатын туруорустулар.
