Майаҕа сэтинньи 28 – ахсынньы 7 күннэригэр Олоҥхо күннэрэ киэҥ далааһыннаахтык ыытыллан, үүнэр көлүөнэҕэ норуот тылынан уус-уран айымньытын билиһиннэриигэ дьоһун суолтаны ылла.
Д.Ф.Ходулов аатынан култуура киинин маассабай тэрээһиннэргэ режиссера Галина Эверстова, фольклорга исписэлииһэ Мария Иванова Аан дойду баайынан билиниллибит саха омук тылынан уус-уран айымньытын – Олоҥхо күнүн үрдүк таһымнаахтык ыыттылар.
Майа сэлиэнньэтин киинигэр турар Саха итэҕэлин балаҕаныгар сарсыардаттан алаадьы минньигэс сыта угуйа тэнийдэ. Бу Анна Павлова салайааччылаах “Райпо бэтэрээннэрэ” түмсүү далбар хотуттара, мэлдьи буоларын курдук, үрдүттэн кэлэн олорон эрэ алаадьылаан сырдьыгынаттылар, кэлбит дьону күндүлээтилэр. Хомус алыптаах тыаһа уоскута-налыта дьүрүһүйдэ, түсчүт Зиновий Игнатьев алгыстаата-арчылаата.
Манна түөрт көлүөнэ олоҥхолоото. “Мичил” оҕону сайыннарар киин кырачааннарыттан саҕалаан И.Г.Тимофеев аатынан лиссиэй 6-с кылааһын үөрэнээччилэрэ, “Кэрэли” эбии үөрэхтээһин киинин иитиллээччитэ Валерия Киренская, “Чугдаар”, “Ноорой сиэннэрэ” фольклор бөлөхтөрүн иитиллээччилэрэ Сайыына Избекова, Айыллаан Пивоваров, “Саха” көрдөрөр-иһитиннэрэр хампаанньа “Олоҥхо-Батл 2023” күрэхтэһиитин муҥутуур кыайыылааҕа Станислав Иванов уонна Евдокия Семенова салайааччылаах “Айыллыат” фольклор түмсүүтэ кытыннылар.
Устар ууну сомоҕолуур уран тыллаах, улаан ньуурдаах урааҥхай саха олоҥхото үс дойду олоҕун үөһээ-аллараа сыымайдаан, киһи-аймах олоҕун тутулун сырдык өттө кыайарын олоҥхоһуттарбыт истэриттэн иэйэ-куойа толорон, эттилэр-тыыннылар. Маннык үс саха баарын тухары өбүгэбит сүдү баайа көлүөнэттэн көлүөнэҕэ салҕанан бара туруоҕа.
Марелла Баишева.
