Майаҕа сэтинньи 16 күнүгэр И.М.Сосин аатынан киин бибилэтиэкэҕэ Аан дойду үрдүнэн 10-с төгүлүн ыытыллар “География дьыктаана – 2024” ыытылынна.
“География дьыктаанын” көҕүлээччинэн Нуучча географияҕа уопсастыбата буолар. Бастакытын маннык дьыктаан 2015 с. ыытыллыбыт. Тоҕус сыл устата сирэйинэн (очно) итиэннэ онлайн-кээмэйинэн ыытыллыбыт дьыктааҥҥа уопсайа 129 дойдуттан 3,6 мөлүйүөн киһи кыттыбыта бэлиэтэммит. Араас континеннарга, Антарктидаҕа, космос куйаарыгар тиийэ суруйан кыттыбыттар. 2023 сылга дойду тас өттүгэр 8000-тан тахса киһи кыттыыны ылбыт. Дьыктааны төрөөбүт дойдуларын туһунан билиилэрин хаҥатар баҕалаах ким баҕарар суруйар. Манна оскуола оҕотуттан саҕалаан бочуоттаах сынньалаҥҥа олорор аҕам саастаах дьоммут, быраастар, учууталлар, артыыстар, спортсменнар, о.д.а. бэйэлэрин билиилэрин бэрэбиэркэлэнэллэр. Дьыктааны араас сиргэ суруйаллар: пуойаһынан айаннаан иһэн, вокзалларга, байыаннай хараабылларга, үлэлиир миэстэлэригэр, о.д.а.
И.М.Сосин аатынан киин бибилэтиэкэ былаһаакката 11 чаастан үлэтин саҕалаата. Бастаан География дьыктааныгар быйыл сэттис төгүлүн кыттар космонавтар видеонан ыҥырыыларын көрдүбүт. Онтон дьыктаан суруллар ирдэбиллэрин кэлбит дьоҥҥо ааҕар саала кылаабынай бибилэтиэкэрэ Марина Трифонова билиһиннэрэн, сиһилии быһааран биэрдэ.
Дьыктаан икки түһүмэхтэн турар, бастакы чааһа чэпчэки соҕус ыйытыктар диэҥҥэ 10 ыйытык, иккис чааһыгар 30 ыйытык киирбит. Таба хоруйдар 1-дии баалынан сыаналанар, түмүккэ уопсайа 40 баал буолуохтаах. Хас биирдиибитигэр тус нүөмэрдээх 2-лии былааҥка бэрилиннэ, олортон иккиһэ ахсынньы 12 күнүгэр түмүкпүтүн билэргэ бэйэбитигэр хаалар.
Бүгүҥҥү дьыктааҥҥа сэлиэнньэ олохтоохторуттан 15 араас идэлээх киһи кыттан географияҕа билиитин тургутта.
Билэр дьоҥҥо чэпчэки буолла быһыылаах. 45 мүнүүтэ суруллуохтаах дьыктаан ыйытыктарын биэрээттэрин кытта лоп курдук 20 мүнүүтэнэн нолуок сулууспатын үлэһитэ Петр Неустроев, 30-тан тахса мүнүүтэнэн оройуоннааҕы балыыһа колл-киинин үлэһитэ Майя Ильина, “Баарт” маҕаһыын атыыһыта Васианна Птицына үлэлэрин туттардылар. Дьыктааны суруйбуттарга туоһу сибидиэтэлистибэлэр туттарылыннылар.
Маннык билиини тургутар дьыктааннар биир интэриэстээх дьону сомоҕолуур күүстээхтэр итиэннэ инникитин билиини хаҥатарга көмөлөһөллөр. Онон киһи биирдэ сырыттаҕына өссө сылдьыан баҕарар.
Марелла Баишева.
