Майаҕа Арассыыйа Бэрэсидьиэнин быыбарыгар кыттыы тэтимнээх

Кулун тутар 15‒17 күннэригэр ыытыллар Арассыыйа Бэрэсидьиэнин талар быыбары дойду олохтоохторо бары долгуйа күүппүппүт.

Бүгүн, кулун тутар 15 күнүгэр, Майа сэлиэнньэтин 255 нүөмэрдээх быыбардыыр учаастагар сарсыарда 8 чаастан бастакы быыбардааччылар көхтөөхтүк кэллилэр. Бэрэссэдээтэл Марианна Монастырева хамыыһыйа састаабын билиһиннэрдэ:

‒ Бэрэссэдээтэли солбуйааччы Федора Морозова, сэкирэтээр Елена Варламова, чилиэннэр Галина Федорова, Семен Петухов, Саргылана Попова, Мария Скрябина, Акулина Скрябина, Александра Назарова, Вера Скрябина, Александра Кузьмина буолан үлэбитин саҕалаатыбыт. Учаастакка уопсай быыбардааччы ахсаана 2038, сайабылыанньа суруйан 108 киһи киирдэ, сайабылыанньанан 269  уонна реестиринэн 21, уопсайа 290 киһи таҕыста. 1 стационарнай уонна 1 көһөрүллэ сылдьар дьааһык үлэлиэҕэ, ‒ диэн баран дьааһыктары көрдөрөн туран пломбалаатылар.

Биир бастакынан улууспут баһылыга Дмитрий Тихонов кэргэнэ Марианна Петровналыын, Ф.Г.Охлопков аатынан орто оскуола дириэктэрэ Андрей Захаров, “Лесной” ТОС салайааччыта Васианна Птицына, эдэр ыал Ольга,  Дмитрий Степановтар о.д.а. быыбардаатылар.

“Сахатранснефтегаз” тэрилтэ үлэһитэ Сардаана Романова:

‒ Быыбар уруккуттан биһиэхэ бырааһынньык курдук кэтэһиилээх буолар, онон үөрэ-көтө кэллим.

Майатааҕы РЭС үлэһитэ Семен Гоголев үлэтигэр ыксаан-тиэтэйэн да истэр, “Быыбарга кыттыы үчүгэй. Конституция биэрбит гражданскай быраабын туһанаммын дойдубут туһугар бэйэм быыбарбын оҥордум”, ‒ диэн ааста.

Дьокуускай куораттан “Ягуар” чааһынай охрана тэрилтэтин үлэһитэ Илларион Оконешников:

‒ Күндү быыбардааччылар, дойдубут Бэрэсидьиэнин талар Быыбарга көхтөөхтүк кэлэн куоластыыргытыгар ыҥырабын, бары чэгиэн буолуҥ, дойдубут чэлгийэ сайдарын туһугар бииргэ буолуоҕуҥ, ‒ диэтэ.

Бу курдук Майатааҕы 255 №-дээх быыбардыыр учаастакка быыбар хаамыыта тэтимнээхтик саҕаланна.

 

Марелла Баишева.