Тохсунньу 22 күнүгэр Майа сэлиэнньэтигэр “Дьол түһүлгэтэ” уопсастыбаннай кииҥҥэ ыаллыы олорор Амма улууһун Амма нэһилиэгиттэн Михаил Артемьев баһылыктаах 5 киһилээх дэлэгээссийэ ыалдьыттаата.
Баһылык солбуйааччыта Альберт Яковлев, кылаабынай исписэлииһэ, юрист Александр Попов, тутууга сүрүннүүр исписэлииһэ Татьяна Яковлева, атыылаһыыга сүрүннүүр исписэлииһэ Лилия Артемьева кэлбиттэр. Икки улуус нэһилиэктэрин бэрэстэбиитэллэрэ “төгүрүк остуол» тула санаа атастаһыылара тэрилиннэ. Кинилэр кэлэ-бара Майа сэлиэнньэтэ сайда-тупса турарын бэлиэтии көрөннөр, үрдүттэн сылдьан билсэ, уопут ыла кэлбиттэр.
“Дьол түһүлгэтэ” уопсастыбаннай киин салайааччыта Евдокия Решетникова Майа сэлиэнньэтигэр быйыл Төрүччү сыла биллэриллэн, аймаҕынан ыытыллар тэрээһиннэр былааннаналларын, төрдү-ууһу үөрэтиигэ, аймаҕы бөҕөргөтүүгэ үлэ-хамнас барыахтааҕын сырдатта.
“Түмэн” уопсастыбаннай холбоһук бэрэссэдээтэлэ Мария Лукина холбоһук иһинэн 39 түмсүү үлэлии олорорун сырдатта, уопсай үлэни-хамнаһы итиэннэ Улуу Кыайыы 80 сылын көрсө “Оонньоммотох оҕо саас” 2-с уонна 3-с кинигэлэрэ бэчээттэнэн тахсалларын билиһиннэрдэ. “Түмэн” сүбэтин чилиэннэрэ, уопсастыбанньыктар Федора Наумова, Людмила Пивоварова, Евдокия Семенова, Антонина Петрова, Ариадна Филиппова, о.д.а. түмсүүлэрин үлэтин кэпсээтилэр. Бу кэннэ ыалдьыттар иис сыаҕын, чүмэчи оҥоруутун, сиэккэ баайыытын үлэлэрин, саха итэҕэлигэр үлэлиир балаҕаны көрдүлэр-билистилэр. Итэҕэл уонна духуобунас киинин балаҕана ыытар үлэлэрин алгысчыт, арчыһыт Анна Климентова сырдатта.
Баһылык Михаил Артемьев нэһилиэгэр 14 түөлбэлээхтэрин, уопсастыбаннай түмсүүлэр, арчы дьиэтэ, Үһүс көлүөнэ оскуолата үлэлииллэрин, уопсастыбанньыктар үлэлиир балаҕаннаахтарын, Майалар үлэлиир уораҕайдарын курдук уопсастыбаннай кииннэнэр баҕалаахтарын эттэ. “Эмиэ да үлэбит майгыннаһара элбэх, ол быыһыгар уратылардаахпыт, эһиэхэ гаас оттук баар буоллаҕына, биһиэхэ оттук мас бэлэмнээһинин үлэтэ баар. Мантан саас онно тахсаары бэлэмнэнэбит. Үп-харчы көрөммүт түөлбэлэри хааччыйа олоробут”, — диэтэ. Амма нэһилиэгиттэн 20-чэ ыччат анал байыаннай дьайыыга кытта сылдьар. Кинилэр дьиэ кэргэннэригэр оттук мастарыгар, иһэр муустарыгар, дьиэлэрин өрөмүөнүгэр субуотунньуктаан күүс-көмө буолаллар. Ааспыт сылга култуура тэрээһинэ элбэҕин, дьон онтон сылайа быһыытыйбытын иһин сороҕун аччаппыттарын, успуорт тэрээһинин оннунан хаалларбыттарын үллэһиннэ. Биир сүрүн кыһалҕаларынан ыт боппуруоһа буолбут. Баһылык Улуу Кыайыы 80 сылын көрсөргө үлэ барарын, туризм хайысхатын сайыннарыыга үлэ барарынан смотровой былаһаакка оҥорор былааннаахтарын, о.д.а. үлэлэрин сырдатта, нэһилиэктэр бүддьүөттэрэ сарбыллыбыта ыарахаттары үөскэтэрин бэлиэтээтэ. Аммалар аспаал суол оҥоһулла турарынан инникитин мэҥэ хаҥаластары кытта биир ситимнээхтик үлэлэһэр баҕалаахтар.
Олохтоох дьаһалта баһылыга Алексей Неустроев, хаһаайыстыбаннай чааһын салайааччы Станислав Павлов ыалдьыттары Д.Ф.Ходулов аатынан култуура киинин, Р.Г.Васильев аатынан кыраайы үөрэтэр түмэли, “Дьол түһүлгэтэ” уопсастыбаннай киини, о.д.а. кэрэ-бэлиэ миэстэлэринэн сырытыннаран, үлэни-хамнаһы көрдөрдүлэр.
Марелла Баишева.
