Анал байыаннай дьайыыга кытта сылдьар биир дойдулаахтарбытыгар көмөлөһөр сыаллаах өрөспүүбүлүкэтээҕи “Саха сирэ эйигин кытта” диэн аахсыйаҕа Майа сэлиэнньэтин олохтоохторо хайа саҕаланыаҕыттан биир бастакынан көхтөөхтүк кытталлар.
Мария Дмитриевна Лукина салайааччылаах “Түмэн” уопсастыбаннай холбоһук түмсүүлэрэ араас гуманитарнай көмөнү оҥороллор. Кинилэргэ тэрилтэлэр баҕа өттүлэринэн сыстан өйөбүл буолаллар.
Ыам ыйын 1 күнүгэр ахсыс сакааска 2 көстүүм, 10 сылаас куллука, 6 кэмпилиэк ардахха-сииккэ кэтиллэр сон (дождевик), 5 ис ыстаан тигиллэн бүттэ. «Лесной” ТОС түөлбэ иистэнэр массыына уларсан көмөлөстө.
Волонтердары “Үрүйэ” ыраас уу тэрилтэ салайааччыта Василий Попов иһэр уунан хааччыйар. Ааспыт нэдиэлэттэн «Кыталык” кииҥҥэ саһыарар сиэккэ оҥоһуутугар Маргарита Максимова, Евдокия Семенова салалталарынан Владимир Сидоров, Валентина Лонгинова, Анастасия Адамова, о.д.а. ылсан үлэлээтилэр. Манна Майатааҕы Екатерина Романова салайааччылаах “Кэнчээри” уһуйаан таҥаһынан итиэннэ 8 үлэһитэ кэлэн күүс-көмө буоланнар, бастакы сиэккэ бэлэм буолла. Сэлиэнньэ олохтоохторо таҥас кырыйан аҕалан биэрэн көмөлөһөллөр. Акулина Сыроватская алгыс тыллардаах 12 харысхалы, 28 саа уоһугар кэтэрдиллэр халпаак оҥорон тиксэрдэ. Заредина Сосина илиигэ-атахха бааныллар анал бэлиэлэри тиктэ. Иискэ Надежда Павлова салайааччылаах социальнай «Биисинэс инкубатор” иистэнньэҥнэрэ баҕа өттүнэн көмөлөһөллөр. Дария, Олег Федоровтар дьиэҕэ олорон ииһинэн көмөлөһөргө сөбүлэһэн, 10 куллуканы тигэн тиксэрдилэр. Людмила Дьяконова сэбиэдиссэйдээх «Мичил” уһуйаан үлэһиттэрэ, ону сэргэ, Акулина Скрябина таҥаһынан уонна илиминэн көмө оҥордулар. 1983 сыллаахха оскуоланы бүтэрбиттэр ый аайы харчынан көмөлөһөргө этии киллэрбиттэрэ.
Дьокуускайтан “Рукавишников” теплоходка сакааһы илдьэргэ-аҕаларга Егор Трифонов салайааччылаах Майатааҕы “Техкоммунсервис” тэрилтэ оптуобустарын суоппардара көмөлөһөргө бэлэмнэрин тиэртилэр. Урукку өттүгэр “Парус” успуорт киинин тириэньэрэ Темир Сыдыкбеков сакааһы аҕалан-тиэрдэн кэлбитигэр иис сыаҕын үлэһиттэрэ махталлара муҥура суох. Майатааҕы Федора Наумова салайааччылаах иис сыаҕын иистэнньэҥнэрэ 9-с сакаас кэллэҕинэ улууспут нэһилиэктэринэн маастар кылаас ыыта бараары бэлэмнэр.
Марелла Баишева.