Майа сэлиэнньэтэ күннэтэ тупсар-киэркэйэр. Ол чэрчитинэн, бүгүн, олунньу 2 күнүгэр В.С. Исаев аатынан уулусса 1/3 нүөмэрдээх дьиэтэ үлэҕэ киирэн 40 кыбартыыра хаһаайыттара күлүүстэрин тутар дьоро күннэрэ үүннэ.
Дьиэни Петр Никифоров салайааччылаах “Арктика Строй” хааччахтаммыт эппиэтинэстээх тэрилтэ тутта.
Екатерина Мосоркина салайааччылаах сахалыы сайбаччы таҥныбыт “Алгыс” бэтэрээн түмсүүтэ саҥа дьиэ арыллар тэрээһинин киэргэттэ. Алгысчыт, арчыһыт Зиновий Игнатьев арыылаах алаадьынан аал уотун аһатан алгыс сиэрин-туомун оҥордо.
Үөрүүлээх күнү “Мэҥэ Хаҥалас улууһа” МО баһылыга Дмитрий Тихонов саҥа дьиэ хаһаайыттарыгар эҕэрдэ тылынан арыйда.
- Ытыктабыллаах олохтоохтору бүгүҥҥү улахан үөрүүлээх уонна долгутуулаах күнүнэн улуус салалтатын уонна тус бэйэм ааппыттан итиитик-истиҥник эҕэрдэлиибин. Дойдубут Бэрэсидьиэнэ Владимир Путин национальнай бырайыактары 89 эрэгийиэҥҥэ үлэлэтэр. Биһиги улуус ол тыыннаах туоһулара уонна ол бырагырааманы туһанааччылар буоламмыт улахан махталлаахпыт. Биһиги улууспутугар аҥардас быйылгы сылга “Хаарбах дьиэ” бырагырааманан 282 дьиэ кэргэн саҥа дьиэҕэ көһөн киириэхтэрэ, 24 тулаайах оҕолорбут Аллараа Бэстээххэ уонна Майаҕа толору хааччыллыылаах дьиэ күлүүстэрин тутуохтара. Маннык тэтими ыһыктыбакка төрөөбүт дойдубутун, улууспутун салгыы сайыннаран иһиэхпит. Саҥа кыбартыыралар оҕо үөрбүт-көппүт саҥатынан куруутун толору буоллуннар, — диэн туран Мэҥэ Хаҥалас улууһун тутуутугар кылаатын уонна өр сыллаах үтүө суобастаах үлэтин иһин, Майа сэлиэнньэтигэр 4-с уочараттаах дьиэ үлэҕэ киирбитинэн “Арктика Строй” хааччахтаммыт эппиэтинэстээх тэрилтэ дириэктэригэр Петр Самойловичка Эҕэрдэ сурук, тэрилтэ прорабыгар Дмитрий Егоровка, мэхэньисээтэр Алексей Лепчиковка, Аллараа Бэстээххэ тулаайах оҕолорго тутуллубут дьиэ прораба Николай Никифоровка Махтал суруктары туттарда.
Арассыыйаҕа Дьиэ Кэргэн, өрөспүүбүлүкэҕэ Оҕо саас сылларынан элбэх оҕолоох Оксана, Иван Филипповтар 4 оҕолорунуун, тулаайах уонна төрөппүт көрүүтэ-истиитэ суох хаалбыт оҕолору дьиэнэн хааччыйыы федеральнай бырагырааманан дьиэ күлүүһүн Герой Попов 63/5 дьиэттэн Аксиния Баишева, Аина Баишева бастакынан туттулар.
Майа сэлиэнньэтэ ТСТ баһылыга Алексей Неустроев:
- Күндү биир дойдулаахтарбытын дьол уйатынан буолар саҥа дьиэ арылларынан итиитик-истиҥник эҕэрдэлиибин! Кырдьык даҕаны, наһаа үчүгэй саҥа кыбаартал баар буолла. 10-ча сыллааҕыта манна хайдах этэй, билигин атын хартыына, атын көстүү. Бастатан туран, биһиги тутааччыларбытыгар бэйэлэрин тапталларын, сатабылларын биэрэн олус үчүгэй дьиэлэри тутан киллэрбиттэригэр махтанабыт. Бу дойдубут Бэрэсидьиэнин эргэ дьиэттэн саҥа дьиэни тупсаран тутан көһөрүү, дьиэлэри оҥоруу, олохпутун тупсарыы бэлиитикэтэ буолар. Бу бэлиитикэ салҕанан барарыгар улахан махталбытын тиэрдэбит, — диэн туран өр сыллаах үтүө суобастаах үлэтин иһин “Арктика Строй” хааччахтаммыт эппиэтинэстээх тэрилтэ дириэктэригэр Петр Никифоровка олохтоох дьаһалта аатыттан Махтал сурук туттарда.
Саҥа дьиэ олохтоохторун ааттарыттан үлэ бэтэрээнэ, Майэ сэлиэнньэтин Бочуоттаах олохтооҕо Антонина Никитина эҕэрдэ уонна махтал тылларын анаата:
- Ытыктабыллаах саҥа дьиэ күлүүһүн туппут олохтоохтору, мустубут дьону барыгытын бу үөрүүлээх күнүнэн истиҥник эҕэрдэлиибин! Хаарбах дьиэ бырагырааманан толору хааччыллыылаах дьиэни биһиэхэ буор босхо тутан биэрбит Дойдубут Бэрэсидьиэнэ Владимир Путиҥҥа, Ил Дархаммытыгар Айсен Николаевка, улууспут баһылыгар Дмитрий Тихоновка, Майабыт баһылыгар Алексей Неустроевка улахан махталбытын биллэрэбит. Ону сэргэ, куйааһы-тымныыны, чаһы бириэмэтин аахсыбакка үлэлээн саҥа дьиэни олоххо киллэрбит “Арктика Строй” хааччахтаммыт эппиэтинэстээх тэрилтэ тутааччыларыгар сиртэн халлааҥҥа диэри барҕа махтал буоллун. Мин 40-ча сыл оһох оттон, уу таһан туох да хааччыллыыта суох мас дьиэҕэ олорон кэллим. Кырдьар сааспар толору хааччыллыылаах саҥа дьиэҕэ киирэрбиттэн олус астынабын, долгуйабын, үөрэбин. Манна киирэр олохтоохтору эҕэрдэлээн туран дьиэбитин чэбэрдик, ыраастык тутан, харыстаан олоруохпут диэн эрэннэрэбин,- диэтэ.
Тэриллэн үлэлээбитэ 20 сыл буолбут “Арктика Строй” хааччахтаммыт эппиэтинэстээх тэрилтэ дириэктэрэ Петр Никифоров 4 этээстээх 40 кыбартыыралаах саҥа дьиэ символическай күлүүһүн “Майа сэлиэнньэтэ” ТСТ баһылыга Алексей Неустроевка туттарда. Петр Никифоров “Бу кыбаарталга 4-с сылбытын үлэлээн тутуутун түмүктээтибит. Үлэбитинэн эрэ буолбакка, барытыгар күүс-көмө, сүбэ-ама буолан кылааттарын киллэрбит баһылыктарбытыгар Дмитрий Ивановичка, Алексей Иннокентьевичка ис сүрэхпититтэн махталбытын биллэрэбит. Дьиэ олохтоохторо бары этэҥҥэ дьоллоохтук олороргутугар, эдэр ыаллар оҕо-уруу төрөтөн, саха ахсаанын элбэтэргитигэр баҕарабыт”, -диэтэ.
Саҥа дьиэ арыллыытын аалай лиэнтэтин Дмитрий Тихонов, Алексей Неустроев, Петр Никифоров уонна элбэх оҕолоох Оксана, Иван Филипповтар дьиэ кэргэн быстылар.
3 подъезтаах дьиэ хас биирдии киирии ааныгар волонтердар үлэлээн олохтоохтору сирдээтилэр. Олохтоох дьаһалта үлэһиттэрэ дьиэ, уу, уот докумуоннарын туттара сылдьаллара.
2-с подъезд саҥа кыбартыыратын хаһаайката Надежда Семенова, “Надис” маҕаһыыннаах урбаанньыт: “Исаева 6 дьиэттэн көһөн кэллибит. Кэргэмминиин 4 оҕолоохпутуттан иккибит ыал буолан туспа барбыттара, билигин уһуйаан уонна оскуола саастаах икки кырабытын кытта олоробут. Кыбадыраата урукку дьиэбититтэн арыый улахан, киирээти кытта киэҥ-куоҥ көрүдүөр, сырдык, сылаас, хосторо киэҥнэр, туалета, бойлердаах ванната туспа турар, саҥа кыбартыыраҕа киирэн үөрүүм үрдэ суох, балконтан оҕо оонньуур былаһаакката, массыына парковката көстөр, онон наһаа үчүгэй буолсу. Өссө да маннык бырагыраама үлэлээн элбэх ыал саҥа дьиэҕэ киирэр үөрүүнү, дьолу биллиннэр, диэн үөрүүтүн үллэһиннэ, баҕа санаатын тиэртэ.
4 оҕолоох Оксана, Иван Филипповтар өр кэтэһэн 3 хостоох саҥа кыбартыыра ылан үөрэн-көтөн маннык бырагыраама баарыгар Дойдубут Бэрэсидьиэнигэр, Ил Дархаммытыгар, улууспут, сэлиэнньэбит баһылыктарыгар, дьиэни туппут тутааччыларга силигин ситэрэн олоххо киллэрбиттэригэр улаханнык махтанабыт диэтилэр. Иван Витальевич Ростелеком монтерунан үлэлиир, Оксана Дмитриевна кыратыгар олорор. Диана 7-с, Мила 4-с, Настя 3-с кылаас үөрэнээччилэрэ уонна кыра кыыс Кира 1 саастаах. Суоппар идэлээх эһэлэрэ, үлэ бэтэрээнэ Дмитрий Николаевич Забровскай оҕолорун үөрүүтүн үллэстэн кыбартыыраны көрө-истэ сылдьар.
Түөрт оҕолоох, кэргэнэ уонна орто уола анал байыаннай дьайыы кыттыылаахтара, Исаева 6 дьиэттэн көһөн кэлбит Анна Егорова, Сэбиэскэй уулусса 3 нүөмэрдээх дьиэтиттэн бииргэ төрөөбүт балтын оҕотугар эппэкиин, инбэлиит ийэлээх Лия Скрыбыкина, 2 оҕолоох, парикмахер идэлээх Татьяна Гермогенова, о.д.а. бу күн саҥа дьиэ күлүүһүн тутан үөрдүлэр-көттүлэр.
Өр кэтэспит ыра санаалара туолан саҥа кыбартыыра күлүүһүн туппут биир дойдулаахтарбытын истиҥник эҕэрдэлиибит.
Марелла Баишева.
