Баһылай Атылааһап майаларга, мэҥэ хаҥалстарга наһаа үчүгэй ыһыахтыыр сири булан, анатан, күрүөлээн-хаһаалаан, сиэдэрэй дьиэлээн-уоттаан, Аар Баҕахтаан биэрдэҕэ. Киэҥэ-куоҥа! Ааттыын «Ураһалаах»!
Ол гынан баран, диэххэ, алгыс түһэр сирэ туора, чиэски турара мунчаардар. Дьоҕус тэрээһиннэргэ, аймаҕынан-тэрилтэнэн мустууларга саамай сөп. Оттон улуус ыһыаҕар дьон төбүрүөннээн олорор сириттэн хаҥас, туора, ыраах, кыараҕас. Бары көһөн тиийдэхпитинэ баппат, тугу да көрбөт да, истибэт кутталлаахпыт. Онон алгыспытыгар нэһилиэктэр уонна улууспут салалтата, Дьокуускайтан үрдүк сололоох ыалдьыттар, алданнар, омук туристара эрэ тиксэллэр. Олохтоохтор матан хаалабыт. Итинник сүөргү көстүү биһиэхэ эрэ баар курдук. Мустубут дьон алгыска бары тиксиэхтээхпит. Алгыһа суох ыһыах туома табыллыбат.
Сорох дьон ыһыахха алгыһы эрэ истэ, алгыһы эрэ ыла кэлэллэлэр. Алгыс сөптөөх, күүстээх буолуохтаах. Үөһээ Айыылары кытта алтыһыы. Сыл тахсыбыппытыгар махтал. Саҥа сылга этэҥҥэ буоллун диэн көрдөһүү. Турукка киирэн туран. Чуумпуга.
Онон, алгыс сиэрэ-туома дьон күргүөмнээн олорор сирдэрин иннигэр, киин түһүлгэҕэ оҥоһуллуохтаах диэн этэбин.
Иккиһинэн. Алгыс кэнниттэн оһуохайы олохтоохтук оонньуохха баара. Тырыбынаҕа олорор дьон бары тоҕо анньан киирэн дуоһуйа үҥкүүлээтэхтэринэ, тыыннарын таһаардахтарына дэлэлээх үчүгэй буолуо этэй?! Дархан этээччилэри, ити эстрада сулустарын курдук хамнастаан ыҥыран, ыксаабакка дуоспуруннаахтык доллоһута этиттэрэр киһи… Төрүт оһуохайбыт нөҥүө өйбүтүнэн-санаабытынан, ырыабытынан-тойукпутунан, эппитинэн-сииммитинэн бары биир сомоҕо буоламмыт, күн эргииринэн хаамаммыт ыһыахха кыттыһабыт, сүрбүтүн көтөҕөбүт, саха буолабыт!
Үсүһүнэн. Төрүт бырааһынньыкпыт кэмигэр аат иҥэрэллэрин (“бочуоттаах”, “туйгун”, “үтүөлээх”, “лауреат”, о.д.а.), бэлиэ, наҕараада туттаралларын отой утарабын. Бастатан туран, элбэх бириэмэни сиир. Иккиһинэн, тыыһынчанан киһиэхэ билбэт киһибит бэлэх-туһах ыларыгар дьон үксэ кыһаммат, суолтата сүтэр. Ыһыах дьонун уопсай маассабай көрөөччү курдук туһаныы буолар. Итини туспа, туһааннаах тэрилтэ түмсүүтүгэр туттараллара быдан тоҕоостоох буолуо этэ (бэйэ дьонун ортотугар эҕэрдэлэһии, үөрүү-көтүү ордук истиҥ). Биллэрин курдук, хас омук аайы улахан бырааһынньыктар таҥараларыгар ананаллар. Ол тэрээһин кэмигэр кими эрэ чорботон наҕараадалыылларын истэ иликпин. Холобур, Ороһооспо кэмигэр наҕараада, бэлиэ туттарбаттар дии (дьиэ кэргэн иһигэр бэлэх бэрсиини кытта буккуйбаккытыгар)?! Онтон биһиги ыһыахпыт Айыыларбытын кытта алтыһыыга ананар ээ, ис сүрэ.
Мин сэбиэскэй кэмҥэ төрөөбүт, үөрэммит, өйбүн туппут киһибин. Ол саҕана саха устуоруйатын, сиэрин-туомун, үгэстэрин билиҥҥи курдук маассабай өрө тутуу суоҕа. Онон үлэлии сылдьар фольклор анал үөрэхтээх ыччаттарга билиим тиийбэтэ чахчы. Сыыһа-халты суруйбут буоллахпына алыс баалаамаҥ.
Миитэрэй Саанньыкап.
