Майа сэлиэнньэтин дьоһун ыалларын эҕэрдэлээтилэр

Дьиэ кэргэн – таптал, өйдөһүү, өйөһүү төрдө. Хайа баҕарар омук кэхтибэт кэскилэ – ыал. Бүгүн Арассыыйаҕа Дьиэ кэргэн, таптал уонна бэриниилээх буолуу күнүн көрсө Майа сэлиэнньэтин ытыктабыллаах олохтоохторо дьоллорун холбоон ыал буолан бииргэ олорбуттара 50 уонна 55 сыла туолбутун бэлиэтиир үөрүүлээх тэрээһин ыытылынна.

Марфа Васильевна, Федот Васильевич Алексеевтар дьиэ кэргэн 50 сыл, Татьяна Сидоровна, Василий Титович Окороковтар дьиэ кэргэн 50 сыл, Джапаридзе Иннокентьевна, Юрий Серафимович Неустроевтар дьиэ кэргэн 50 сыл, Ольга Иннокентьевна, Василий Васильевич Захаровтар дьиэ кэргэн 55 сыл устатын тухары истиҥник санаһан, дириҥник убаастаһан олох үөрүүтүн, хомолтотун барытын тэбис-тэҥҥэ үллэстэн, илии-илиилэриттэн сиэттиһэн бииргэ олорор ытык ыаллар.

Үбүлээрдэри улуус баһылыгын социальнай боппуруостарга уонна имиджевэй бэлиитикэҕэ солбуйааччы Альбина Григорьева, “Майа сэлиэнньэтэ” тыа сирин түөлбэтин баһылыга Алексей Неустроев эҕэрдэлээтилэр. Ыаллар Ил Дархан Айсен Николаев Эҕэрдэ суругун уонна “Дьиэ кэргэн килбиэнэ” бэлиэни, «Мэҥэ Хаҥалас улууһун Ытык ыала» итиэннэ  Майа сэлиэнньэтин “Бигэ ыал” бэлиэтин үөрүүлээх быһыыга-майгыга туттулар.

Гражданнар туруктарын аактатын суруйар исписэлиис Анна Дмитриева өйдөбүнньүк кинигэҕэ бииргэ олорбуттара кыһыл көмүс сыбаайбатын бигэргэтэн илии баттатта. Майа лиссиэйин асчыта Александра Жиркова бэлэх оҥорон астаабыт минньигэс туордун амсайдылар.    Үйэ аҥардаах кыһыл көмүс сыбаайбаҕа хайдах тиийэри толору билбит ыал Неустроевтар: “50 сыл бииргэ олоруу – сибэккилээх хонууну ааһар курдук чэпчэки буолбатах, олох түһүүлээх-тахсыылаах, ону барытын эн-мин дэсиһэн, бииргэ тулуйан олордубут»,- диэн билинэллэр. Ыал ийэтэ Джапаридзе Иннокентьевна эдэр ыалларга бэйэ-бэйэни өйдөһөн, дириҥник ытыктаһан, кыыһырсар күҥҥэ дириҥэппэккэ бырастыы гынарга сүбэлээтэ.

Ийэ-аҕа дэтэр сирдээҕи аналгытын чиэстээхтик толорбут ытык дьоммут, доруобайдык этэҥҥэ сылдьан оҕолоргут, сиэттэргит тапталларыгар угуттанан өссө уһуннук олороргутугар баҕарабыт, эһигини холобур оҥостобут, киэн туттабыт.

 

Елизавета Неустроева.