Майа сэлиэнньэтигэр оҕо-аймах эбиллэр

Арассыыйаҕа Дьиэ кэргэн, Саха Өрөспүүбүлүкэтигэр Оҕо саас сылларыгар Майа сэлиэнньэтигэр оҕо-аймах эбиллэр, дьиэ кэргэн улаатар. Маныаха өрөспүүбүлүкэ, улуус, нэһилиэктэр дьаһалталара олорорго, үөрэнэргэ, үлэлииргэ табыгастаах, сөптөөх усулуобуйаны эргиччи тэрийэллэр.

Майа сэлиэнньэтин олохтоохторо Наталья Алексеева уонна Софья Федорова этэҥҥэ оҕолонон бүгүн, ыам ыйын 17 күнүгэр, төрүүр дьиэттэн таҕыстылар.

Наталья Петровна, Роман Александрович Алексеевтар 3-с оҕолорун кыыһы, Софья Алексеевна, Александр Юрьевич Степановтар 5-с оҕолорун уолу Күн сирин көрдөрдүлэр. Алексеевтар дьиэ кэргэн аҕа баһылыга Роман Александрович сибэкки дьөрбөтө тутуурдаах кэлэн балыыһа үлэһиттэригэр махтанна.

Аан дойдутааҕы Дьиэ кэргэн күнүнэн Майа сэлиэнньэтин баһылыга Алексей Неустроев, баһылыгы социальнай уонна имиджевэй бэлиитикэҕэ солбуйааччы Вячеслав Санников, дьиэ кэргэн отделын салайааччы Владилена Павлова, социальнай бэлиитикэ управлениетын начаалынньыга Октябрина Кулешова, дьиэ кэргэни кытта үлэлиир отдел салайааччыта Ньургуйаана Охлопкова, төрүүр отделение сэбиэдиссэйэ Зоя Москвина эдэр ыаллары үөрүүлээх күннэринэн эҕэрдэлээтилэр. Бэлиэ күнүнэн олохтоох дьаһалта уонна улуустааҕы социальнай бэлиитикэ управлениетын  үлэһиттэрэ кыра оҕоҕо аналлаах дьиэҕэ туттуллар малы-салы бэлэх ууннулар. Бу күн кыттыылаахтара элбэх оҕолоох эдэр ыаллары Наталья Петровна, Роман Александрович Алексеевтары, Софья Алексеевна, Александр Юрьевич Степановтары үөрүүлээх быһыыга-майгыга алаһа дьиэлэригэр алҕаан атаардылар.

Улууспут “Эркээйи” хаһыатын эрэдээксийэтин кэлэктиибин аатыттан эдэр ыаллары эбиллиинэн истиҥник эҕэрдэлиибит! Кырачаан дьоммутугар дьоллоох оҕо сааһы баҕарабыт.

 

Марелла Баишева.