ү
Майа сэлиэнньэтигэр сэбиэскэй кэмтэн саҕалаан, кэлин «Манчаары» кэпэрэтиип үлэлэтэн, эт-үүт кэмбинээтэ нэһилиэнньэни олохтоох бэйэ оҥорон таһаарар бородууксуйатынан хааччыйан кэлбитэ.
Кэнники кэмҥэ тэрилтэ кэккэ ыарахаттары көрсөн, үлэтин тохтоппута, моҥкурууттаабыта. Быйылгы сылтан, аукцион түмүгүнэн, олохтоох бородууксуйаны соҕотуопкалыыр өҥөнү оҥорор буойуна Тараҕай нэһилиэгин урбаанньытыгар Роман Герасимов көрүүтүгэр бэрилиннэ.
Тэрилтэ сүөһүнү өлөрөр, астыыр пууна сэтинньи 7 күнүттэн үлэтин саҕалаата.
«Быйыл былаан быһыытынан 30 туонна эти бэлэмниэхтээхпит. Ону барытын харайарга ыскылааттар, түргэнник тоҥорор (шоковай заморозкалаах) хаамыра, 40 туонна эти батарар рефрижератор контейнер бааллар. Салгыы полуфабрикат (эриллибит эт, бэлимиэн, миин буолар састаап уо.д.а.) оҥорор сыах, үлэһиттэр сынньанар толору хааччыллыылаах дьиэлэрэ өрөмүөннэниэхтэрэ, сылы эргиччи үлэлииригэр гаас холбонуо.
Инникитин буойунаҕа чааһынай кэтэх хаһаайыстыбалаах дьон, кэпэрэтииптэр эттэрин туттаралларыгар уонна атыыга таһааралларыгар эттээн-астаан биэрэр өҥө баар буолуо», – диэн урбаанньыт Роман Романович Герасимов иһитиннэрдэ.
Иван Лукин.
