Муус устар 14 күнүгэр Майа сэлиэнньэтэ төрүттэммитэ 122 сылын нэһилиэнньэ өрө көтөҕүллэн бэлиэтээтэ.
Үөрүүлээх тэрээһини Майа сэлиэнньэтин бастыҥ спортсменнарын бараата арыйда. Манна дойдуларын аатын улахан таһымнаах күрэхтэһиилэргэ чиэстээхтик көмүскээбит, Майаларын аатын дорҕоонноохтук ааттаппыт араас көлүөнэ чулуу спортсменнар киин Майинскай уулуссанан сэлэлии хааман Комсомольскай болуоссакка кэллилэр.
“Мэҥэлэр – хайа үрдүгэр” дэтэн кэлбит волейбол, тустуу, остуол тенниһэ, футбол, сүүрүү, ыстаныы, буулдьанан ытыы, ох саа, саахымат, дуобат, хабылык, хаамыска, мас тардыһыы, буокса, хайыһар, о.д.а. успуорт көрүҥнэрин кыайыылаахтарын успуорт управлениетын исписэлииһэ Виталий Пестряков эҕэрдэлээтэ.
“Майа сэлиэнньэтэ” тыа сирин түөлбэтин баһылыга Алексей Неустроев:
- Кэрэ-бэлиэ күнүнэн, күндү-мааны Майам олохтоохторо, кэнчээри ыччаппыт, аҕам саастаах дьоммут-сэргэбит, Майабыт төрөөбүтэ 122 сылынан олохтоох дьаһалта, дьокутааттар, уопсастыбаннас аааттарыттан эҕэрдэлиибин! Бу сыллар усталарыгар Майабыт үүнэр-сайдар, кэнчээри ыччат эбиллэр, олохпут салҕана турар. Билиҥҥи Майа саҥа таас Майаҕа кубулуйар, дьон-сэргэ кэрэхсии көрөр, сынньанар миэстэтэ элбээн иһэр. Үүммүт сылга монуммеммыт, «Таптал көлүччэтэ”, “Кыайыы аартыга” саҥардыллыылара саҕаланыа. Майинскай уулусса саҥа аспаалланыа, инникитин Дьоруой Попов уулусса аспаалланара, уу барар сирдээх буолара былааннанар. Быйыл Майабытыгар Чөл олох сыла, ыччаппыт чөл олохтоох, чэгиэн буоларыгар баҕарабыт, — диэн эҕэрдэтигэр эттэ.
Дьоро күн кэнсиэрэ СӨ култууратын үтүөлээх үлэһитэ Сардана Осипова толоруутугар “Майа сайына” ырыанан арылынна. Ф.Г.Охлопков аатынан орто оскуола үөрэнээччилэрин толоруутугар “Оһуокай”, 2 “б” кылаас үөрэнээччилэрин “Үөрүү”, Игорь Игнатьев “Саха ыала”, Наталья Стручкова “Эдьиий”, Елизавета, Герман Неустроевтар “Дьоллоох дьиэ кэргэн”, В.П.Ларионов аатынан орто оскуола 4 “б” кылааһын үөрэнээччилэрин “Кустукчаан” ырыа ансаамбыла “Дорообо, саҥа күн”, Арылхан Касьянов “Дьоллоохпун”, Алена Скрябина “Омук анала” ырыа, Прокопий Федоров “Таптыыр, ахтар Майабыт” ырыаларынан, “Кэрэли” оҕону эбии үөрэхтээһин киинин иитиллээччилэрин толоруутугар “Аныгылыы үҥкүү”, Станислав, Мария Ивановтар дьиэ кэргэнинэн, В.П.Ларионов аатынан орто оскуола 11-с кылааын үөрэнээччитэ Айтал Иванов кэрэхсэбили ылбыт нүөмэрдэринэн эҕэрдэлээтилэр.
Хорчуопка үлэлээтэ, шашлык, плов, шаурма, утах арааһын атыылаатылар. Араас аттракционнарга, хаатыҥка быраҕыытыгар, хоккейга, баскетболга, турникка тардынан элбэх киһи, төрөппүттэр оҕолорунуун боруобаланан көрдүлэр. В.П.Ларионов аатынан оскуола 5 “а” кылааһын үөрэнээччитэ Андрей Егоров, 4 кылаас үөрэнээччитэ Костя Слепцов, тиргэ элбэх оҕо, улахан дьонтон “Кэнчээри” оҕону сайыннарар киин үлэһитэ Октябрина Ефремова 2 бирииһи, Анастасия Брызгалова, бочуоттаах сынньалаҥҥа олорор Валерий Романов, көхтөөхтүк кыттан бириистэри тутан үөрдүлэр-көттүлэр.
Бэлиэ күнүнэн Майа сэлиэнньэтин сайдыытыгар бэйэлэрин кылааттарын киллэрсэр, таһаарыылаахтык үлэлии сылдьар дьон наҕараадаланнылар. “Майа – дойдум барахсан” Бочуоттаах бэлиэнэни СӨ үөрэҕириитин туйгуна, “Сардаана” оҕону сайыннарар киин бэтэрээнэ Александра Игнатьева, “Камила” маҕаһыын хаһаайыстыбаннай салаатын атыыһыта Парасковья Кулаковская, улууспут гиирэҕэ хамаандатын тириэньэрэ Виталий Пестряков, ритуальнай өҥөнү оҥорор тэрилтэ үлэһитэ Владислав Чечебутов, ОДьКХ улуустааҕы учаастагын силиэсэрэ Иван Брызгалов, Д.Ф.Ходулов аатынан култуура киинин тыаһы-ууһу таҥар оператора Александр Теряков, баһылык чаһылаах Бочуоттаах грамотатын Д.Ф.Ходулов аатынан култуура киинин суоппара Илья Сидоров баһылык илиититтэн үөрүүлээх быһыыга-майгыга туттулар.
“Дьиэ кэргэн – сэлиэнньэ тирэҕэ” быыстапкаҕа Клавдия, Дмитрий Апросимовтар дьиэ кэргэн, “Новострой” түөлбэ олохтоохторо Айталы, Марк Сутаковтар, “Промкомбинаттан” Март, Елизавета Ивановтар, Дмитрий, Раиса Стручковтар, “Лесной” түөлбэттэн Эдуард, Денис, Владислав Яковлевтар, “Бадаайы” түөлбэттэн Александра Мохначевская, Архип, Светлана Скрябиннар дьиэ кэргэттэрэ ситиһиилээхтик кыттан өйдөбүнньүк бэлэхтэринэн бэлиэтэннилэр.
Хаатыҥканы ыраах быраҕыыга уолаттарга Аллараа Бэстээх 11-с кылааһын үөрэнээччитэ Толя Петров, кыргыттарга И.Г.Тимофеев аатынан лиссиэй 11-с кылааһын үөрэнээччитэ Дуня Соловьева, эр дьоҥҥо Майаттан Роман Гоголев, дьахталларга Анна Попова кыайыыны ситиһэннэр баһылык илиититтэн бириистэри туттулар. Хорчуопканы киэргэтиигэ Елена Трифонова кыайыылааҕынан ааттанан, минньигэс астаахтарынан Артем Гоголев, Валентина Мартынова ааттананнар баһылык Алексей Неустроевтан сэртипикээт туттулар.
Бүгүҥҥү үөрүүлээх күнү эр дьон 6-лыы киһилээх 9 хамаанданан ханаат тардыһыытыгар киирсиилэрэ ордук киэргэттэ. Майаттан “Манчаары”, “Баарт”, “Боотур”, ОДьХХ, баһаарынай чаас, «Силовой структура» итиэннэ Чүүйэ, Хара, Лоомтука нэһилиэктэриттэн хамаандалар сүүмэрдэнэн туруорулуннулар. Бу күрэхтэһиигэ кыайыылааҕынан биир хамаанда тахсыахтаах буолан дьулуурдаахтык кытыннылар. Тыҥааһыннаах киирсиигэ «Боотурдар» хамаандалара кыайыылааҕынан тахсан Ил Түмэн дьокутааттара Олег Марков уонна Тихон Скрябин туруорбут 600 ботуруон сэртипикээтинэн наҕараадаланнылар. Бу кус сааскы сезона саҕаланаары турдаҕына күүстээх аҥардарга дьоһун бэлэҕинэн буолла. Олох-дьаһах хомунаалынай хаһаайыстыба күүстээх хамаандата иккис миэстэ буолла. Ханааты тардыһыы күрэхтэһиитин судьуйаларынан Дмитрий Игнатьев уонна Дмитрий Сидоров үлэлээтилэр.
Майа сэлиэнньэтэ төрүттэммитэ 122 сылынан ыытыллыбыт норуот күүлэйэ үрдүк тэрээһиннээхтик ыытыллан дьон-сэргэ, оҕо-аймах үөрэн-астынан тарҕаста. Сааскы сылаас күннээх, былыта, тыала суох үүт-тураан күҥҥэ киэҥ хабааннаах тэрээһини култуура исписэлииһэ Галина Эверстова кыайа-хото тутан сэргэхтик ыытта.
Марелла Баишева.
