Мэҥэ Хаҥаласка Саха Өрөспүүбүлүкэтин бырабыыталыстыбатын отчуота олунньу 16 күнүгэр түмүктэннэ. Бу нэдиэлэ устата улуус бары нэһилиэктэрин хабан нэһилиэнньэ иннигэр отчуоттаабыт СӨ экэниэмикэҕэ миниистирэ Петр Попов салайааччылаах оробуочай бөлөх бастаан Майа сэлиэнньэтин олохтоохторун кытары көрүстэ.
Майа сэлиэнньэтин баһылыга Алексей Неустроев мунньаҕы киирии тылынан аста. Отчуоттуур бөлөх састаабын улуус баһылыга Дмитрий Тихонов билиһиннэрдэ.
Бөлөх салайааччыта, бырабыыталыстыбаҕа Мэҥэ Хаҥалас улууһун кураатара Петр Попов толоруулаах былаас ааспыт 2023 сыллаах үлэтин туһунан дакылаатын кэнниттэн олохтоохтор үгүс дьон интэриэһин таарыйар ыйытыыларын биэрэн, дакылааты дьүүллэһэн, кыһалҕаларын туруорсан, кэпсэтиигэ көхтөөхтүк кытыннылар.
Олохтоохтор сэлиэнньэ суолларын, уу ааһар ханаабаларын салгыы оҥоруу, сырдатыы, хомунаалынай, кытаанах бөҕү хомуйуу, ону тэҥэ тырааныспар өҥөлөрүн, уматык иһин тарыыптар, бородуукта сыаната үрдүү турарын тохтотууга туох үлэ барарын, дьон көһөн барбыт хаарбах дьиэлэрин көтүрүү, Маамыкаан түөлбэтин гаастааһын, Чыамайыкыга көстүбүт сир баайын, ыанар ынахха көрүллэр субсидия, улууска бөдөҥ спортивнай оонньуулары ыытыыны туруорсуу, эдэр ыаллары дьиэнэн хааччыйыы бырагырааматын туһунан, о.д.а.ыйытыылары биэрэн туһааннаах салайааччылартан сиһилии хоруйдары ыллылар.
Педагогическай үлэ бэтэрээнэ Анна Петрова өрөспүүбүлүкэҕэ бастакынан тэриллибит Майатааҕы успуорт түмэлэ ыччаты дойдуга бэриниилээх буолуу тыыныгар иитиигэ оруолун ыйан туран өйүүллэригэр, мусуойга үлэһит штатын көрөллөрүгэр көрдөстө. Сылгы иитиитинэн дьарыктанар Кузьма Бурнашев сылгыны хааччахха иитии туһунан саҥа киирбит сокуон биһиги усулуобуйабытыгар сөбө суоҕун, ыччаты тыа сиригэр олохсутар туһуттан “Земскэй доктор” бырагыраама курдук тосхол толкуйдаан тэрээһиннээх хаһаайыстыбаларга үлэлэтиэххэ сөбүн, сүөһү, сылгы ииттэр дьоҥҥо уматык сыанатын аҥаарын судаарыстыба толуйара буоллар улахан тирэх буолуо этэ диэн санаатын үллэһиннэ. Дьон үксэ толору хааччыллыылаах дьиэлэргэ көһөннөр, Майа сэлиэнньэтигэр кирдээх ууну ыраастыыр итиэннэ кытаанах бөҕү уматар ыстаансыйалар тутуллууларын быһаарарга, иһэр уу хаачыстыбата мөлтөҕүнэн ыраастыыр тэрили туруорарга, Аллараа Бэстээхтэн тимир суолга туоруохха диэри кэрчиги кэҥэтэргэ, сырдатарга туруорсан Дмитрий Титов эттэ. Ариадна Филиппова «Энергосбыт» тэрилтэ Майаҕа нэдиэлэҕэ иккитэ эрэ кэлэн үлэлиирэ кэрэгэй, кырдьаҕас, каассаҕа тиийэн төлүүр дьоҥҥо табыгаһа суох, бастайааннай үлэһити туруорсуохха диэтэ итиэннэ хаарбах дьиэттэн дьону көһөрүү бырагыраама тохтообокко салгыы үлэлииригэр баҕарабыт диэтэ. Майа киин уулуссата оҥоһуллар буолбутуттан үөрэллэрин этэн туран, салгыы былаан быһыытынан атын, ол иһигэр өрөспүүбүлүкэ суолталаах суоллары оҥорууга, сырдатыыга үп көрүллэрин Марианна Яковлева туруоруста.
Улууска диализ киинин арыйан үлэлэтэр туһунан этиигэ Аллараа Бэстээххэ тутуллар учаастактааҕы балыыһа стационарыгар Илин эҥэр улуустары хааччыйар диализ салаатын арыйыахха сөп диэн үөрэтии бара турарын иһитиннэрдилэр.
Чааһынай дьиэлээх сааһырбыт дьоҥҥо хаарбах дьиэттэн көһөрүү тосхолун курдук бырагыраама ылылларын, инбэлиит оҕолоох ыалы итиэннэ урукку кэмҥэ тыа хаһаайыстыбатыгар үлэлээбит кырдьаҕастары дьиэнэн хааччыйыы туһунан Светлана Дьяконова туруоруста. Урбаанньыт Архип Скрябин чөл олоҕу тарҕатар, успуорт кыһыҥҥы көрүҥнэрин сайыннарар инниттэн муус дыбарыаһын тутуоҕуҥ диэн этии киллэрдэ. Биһиги улууспутунан федеральнай, өрөспүүбүлүкэ суоллара ааһалларын, суол быһылаана элбэҕин учуоттаан туран улуус балыыһатыгар травматология салаатын куойкатын элбэтэри, олус наадалаах МРТ аппарааты туруорсан Зиновий Игнатьев эттэ.
И.Г.Тимофеев аатынан Майатааҕы лиссиэй төрөппүттэрин ааттарыттан Иван Пивоваров оҕолор билигин 4 сиринэн үөрэнэллэрин этэн туран инженернэй хайысхалаах үөрэх кыһатын саҥа дьиэтин тутууну түргэтэтэргэ туруоруста. Кытаанах бөҕү хомуйуу иһин төлөбүр, күһүн-саас өртөөһүнү көҥүллээһин туһатын туһунан Ытык ыал ийэтэ Нина Никанорова эттэ. Кини Афганистаҥҥа, Чечняҕа, о.д.а. сэриилэргэ сылдьыбыт дьоҥҥо судаарыстыба туох эмэ чэпчэтии, эбии биэнсийэ, босуобуйа көрөн, дьиэнэн хааччыйан, үтүөлэрин төлүөн наада диэтэ. Билигин үлэтэ суох сылдьар эдэр дьону төрүт дьарыкка, тыа хаһаайыстыбатыгар сыһыарыахха диэн санаатын үллэһиннэ.
Федор Баишев биир дойдулаахтарын сүрүн кыһалҕата – Бэдьимэҕэ оскуола тутуута быһаарыллар суолга киирбититтэн үөрэллэрин, кэтэһэллэрин, Василий Эверстов салалта өттүттэн инфляцияны аччатарга үлэ эрэйиллэрин, Александра Шестакова Майаҕа саҥа успуорт саалата тутуллара наадатын туһунан эттилэр.
Д.Ф.Ходулов аатынан култуура киинигэр буолбут мунньахха 160 киһи сырытта. Кэпсэтиигэ кыттыбыт дьон өрөспүүбүлүкэ салалтата хас нэһилиэк аайы маннык отчуоттары тэрийэн, тыа сирин дьонун кыһалҕатын истэрин, кинилэр туруорсууларын быһаарыыга сөптөөх үлэни ыытарын бэлиэтээтилэр, үгүс боппуруостар быһаарыллан, олоххо киирэллэрин иһин махтаннылар.
Февронья ОХЛОПКОВА.
