Киргизия Бишкек куоратыгар сэтинньи 30 – ахсынньы 1 күннэригэр буолбут мас рестлиҥҥэ Аан дойду чөмпүйэнээтигэр Арассыыйа сүүмэрдэммит хамаандатыгар киирсибит Саха сирин мадьынылара уопсайа 18 кыһыл, 12 үрүҥ уонна 15 боруонса мэтээли ылары ситиспиттэрэ.
Олор истэригэр улахан саастаах оҕолорго ХИФУ маҥнайгы кууруһун устудьуоҥката, Мэҥэ Хаҥалас улууһун Хаптаҕай нэһилиэгиттэн төрүттээх, И.Г.Тимофеев аатынан Майа лиссиэйин 2024 сыллаахха үрүҥ көмүс мэтээлинэн бүтэрбит, оҕо успуорка оскуолатын иитиллээччитэ Валерия Никифорова үрүҥ көмүс призер буолары ситиспитэ.
Бүгүн Майа лиссиэйин үөрэнээччилэрэ, учууталлара Валерияны уонна кини мас тардыһыыга тириэньэрин Александр Герасимовы үөрэн, долгуйан көрүстүлэр. Лиссиэй дириэктэрэ Татьяна Попова үөрэх кыһатын үгүс сылларга үөрэҕи уонна успуорду, култуураны кытары тэҥҥэ дьүөрэлээн, ситиһиилээхтик үөрэнэн бүтэрбит бастыҥ үөрэхтээх оҕолор баалларын холобурдаата. Валерия интэринээккэ олорон үөрэнэн, икки сыл иһигэр мас тардыһыытынан утумнаахтык дьарыктанан, оҕолорго Арассыыйа чөмпүйүөҥкэтэ, онтон Аан дойду иккис призера буолары ситиспитин киэн туттан туран эҕэрдэлээтэ.
Үөрэнээччилэр бастыҥ спортсменкаҕа үгүс ыйытыылары биэрдилэр. Инникитин оҕолор үөрэххэ, успуорка дьулуһалларыгар бу көрсүһүү дьоһун суолталаах буолла.
