Быйылгы саҥа үөрэх дьылыгар М.П.Габышев аатынан Балыктаах орто оскуолатыгар 86 үөрэнээччи сайыҥҥы сынньалаҥ кэнниттэн үөрэ-көтө муһуннулар.
Билии күнүн үөрүүлээх чааһыгар бэйэлэрин эҕэрдэлэрин улуус үөрэҕириитин уопсай үөрэхтээһин отделын кылаабынай испэсилииһэ Николай Аржаков уонна улуус Биисинэс-инкубаторын дириэктэрэ Сергей Сергучев тиэртилэр. Оскуола боруогун саҥа атыллаан үөрэнэ киирбит кырачаан үөрэнээччилэри оскуола дириэктэрэ Егор Иванов эҕэрдэлээтэ.
«Мэҥэ нэһилиэгэ» муниципальнай тэриллии баһылыга Александр Куприянов бэтэрээн учууталлары, үлэһиттэри-үөрэнээччилэри саҥа үөрэх сылынан эҕэрдэлээтэ уонна маҥнайгы кылаас оҕолоругар улуус баһылыга Дмитрий Тихонов ыыппыт бэлэхтэрин туттартаата. Оскуола боропсойууһун бэрэссэдээтэлэ Сардаана Молукова аахсыйанан көмөтүн тиксэрдэ.
Быйылгы үөрэх дьылыгар саҥа үлэлии кэлбит эдэр учууталларынан маҥнайгы кылааска Айыына Олесова, физкултуураҕа Александра Семенова, технологияҕа, уруһуйга Гаврил Дьяконов буоллулар. Үөрэнээччилэр учууталларыгар, бэтэрээн учууталларга сибэкки дьөрбөтүн бэлэх ууннулар. Быйылгы үөрэх дьылыгар улууспутугар үөрэхтээһин тэриллибитэ 150 үбүлүөйдээх сылынан таһаарыылаах үлэни, үрдүк ситиһиилэри баҕарабыт.
Мария Захарова. Балыктаах
