Люлия Григорьева: «Дьон туһугар үлэ хаһан баҕарар үтүө түмүктээх буолар»

Бүгүн, кулун тутар 21 күнүгэр, мэҥэ хаҥаластар ытыктыыр биир дойдулаахпыт, Муома, Эбээн Бытантай, Мэҥэ Хаҥалас улуустарын Бочуоттаах олохтооҕо, Саха АССР Үрдүкү Сэбиэтин Президиумун Бэрэссэдээтэлигэр тиийэ үүммүт сатабыллаах салайааччы, өрөспүүбүлүкэ Ытык Сүбэтин бэрэссэдээтэлэ Люлия Григорьева төрөөбүт күнэ. Бу күн номнуо төрдүс сылын үгэс быһыытынан Ураһалаах алааска улуустааҕы хаалыктаах хаамыы ыытылынна.

Бастакы тэрээһин Люлия Николаевна көҕүлээһининэн 2021 сыллаахха кини 80 сааһын туолар күнүгэр тэриллибитэ. «Астаах-үөллээх, остуоллаах бырааһынньык оннугар улууһум уопсастыбанньыктарыгар анаан куруук чөл, чэбдик олоҕу көҕүлээтиннэр, дьонум-сэргэм көхтөөх, чэгиэн, уһун үйэлээх буоллун диэн хаалыктаах хаамыыны тэрийиэҕиҥ» диэн этиитин улууска үөрүүнэн өйөөбүттэрэ.

Бүгүн Ураһалаахха Моорук, Мэлдьэхси, Хорообут, Нөөрүктээйи, Хочо, Тиэлиги, Чүүйэ, Майа уопсастыбанньыктара, хаалыктаах хаамааччылар муһуннулар. Сүрүн үлэтин таһынан 60 сыл уопсастыбаннай үлэҕэ уһаарыллан кэлбит ытык киһибит Люлия Николаевна кинилэргэ туһаайан:

– Дьон туһугар үлэ хаһан баҕарар үтүө түмүктээх буолар, кытаатан дьоҥҥутун-сэргэҕитин бэйэҕит холобургутунан көҕүлээҥ, чөл олоҕу тарҕатыҥ, бастыҥ үлэлээх, ыарахан, тыа хаһаайыстыбатыгар оҥорон таһаарар үлэҕэ сылдьар дьоҥҥутун өйөөн үөһээ таһаарыҥ, — диэн сүбэлээтэ, урукку кэмҥэ оройуоҥҥа бу хайысхаҕа хайдах-туох үлэлээн кэлбит уопутуттан үллэһиннэ.

Тэрээһиҥҥэ мустубут дьону улуус социальнай бэлиитикэҕэ управлениетын начаалынньыга Октябрина Кулешова, улуус бэтэрээннэрин сэбиэтин бэрэссэдээтэлэ, хаалыктаах хаамыыны саҕалааччы Маргарита Максимова, «Сахамедстрах» Мэҥэ Хаҥаластааҕы салаатын салайааччыта Сардаана Литвинцева эҕэрдэлээтилэр.

Уопсастыбанньык Ариадна Филиппова хаамыыга сөпкө тыыныы оруолун туһунан сүбэлэрин биэрдэ, хаамыах иннинэ эрчиллиилэри оҥоттордо. Ол кэннэ бары Ариадна Абрамовна салалтатынан эрчимнээхтик хардыылаан хаалыктаах хааман кэллилэр.

Кыыдамныыр хаардаах, сөбүгэр тыаллаах сааскы сылаас күн сибиэһэй салгыҥҥа сылдьан, эрчимирэн, олус астыннылар. Оттуллубут тимир оһох суоһугар сылыйбыт балаҕаҥҥа киирэн итии чээй истилэр, сылаас ас аһаатылар, күө-дьаа кэпсэттилэр.

Үгэс быһыытынан сыллата олохтуур харчынан бирииһин Люлия Григорьева быйыл Дьиэ кэргэн сылынан Павловскайтан кэлбит Анна Ивановна Аринкинаҕа уонна кини кыыһыгар Вера Васильевнаҕа туттарда. Социальнай бэлиитикэҕэ управление олохтообут «Тэтимнээх хаамааччы» диэн анал аатын Ариадна Филиппова ылла. Тэрээһин биир саамай саастаах кыттыылааҕар Анна Санниковаҕа «Дьулуурдаах кыттааччы» диэн анал аат иҥэрилиннэ, ону тэҥэ управление анал бирииһэ Мэлдьэхситтэн Харитина Ксенофонтоваҕа туттарылынна.

Улуустааҕы бэтэрээн сэбиэтин «Утумнаах хаамыы» диэн анал аатын Хорообуттан Ирина Ильина ылла. «Сахамедстрах» Мэҥэ Хаҥаластааҕы салаатыттан бириистэри Мэлдьэхситтэн Мария Охлопкова, Павловскайтан Людмила Оконешникова уонна Мооруктан Максим Ксенофонтов туттулар.

Түмүккэ инникитин үгэс быһыытынан сыллата ыытыллар чөл олоҕу тарҕатар тэрээһини өссө кэҥэтэн, элбэх кыттааччыны хабан, “Люлия Григорьева аатынан хаалыктаах хаамыы бэстибээлэ” диэн ааттаан тэрийэргэ сүбэлэстилэр.

Оттон 83-с хаарыгар үктэммит ытык киһибит Люлия Николаевна салгыы Чүүйэҕэ, онтон сарсын Тумулга тыа хаһаайыстыбатын тэрилтэлэрин үлэлэрин билсэ айаннаата.

 

Февронья ОХЛОПКОВА.