Ахсынньы 13 күнүгэр улуус баһылыга Дмитрий Тихонов быйылгы сыллааҕы үлэтин отчуотун 1-кы Тыыллыма нэһилиэгэр туруорда. Сарсыарда 9 чаастан отчуоту истэ култуура киинигэр 73 киһи муһунна. Мунньахха СӨ Судаарыстыбаннай Мунньаҕын (Ил Түмэнин) дьокутаата, «Саха» НКИХ генеральнай дириэктэрэ Олег Марков, оройуон Сэбиэтин дьокутаата Мэхээс Масаха улуус кэккэ управлениеларын салайааччылара, хаһаайыстыбаннай тэрилтэлэр эппиэттээх үлэһиттэрэ кытыннылар.
Баһылык улууска ыытыллыбыт быйылгы үлэни-хамнаһы биир-биир салааларынан кэлин үс сыл көрдөрүүлэригэр тэҥнээн ырытан, ону улахан экраҥҥа көрдөрөн билиһиннэрбитэ болҕомтону тарта.
Отчуот сүнньүнэн олохтоохтортон, сир ахсын буоларын курдук, үгүс ыйытыы киирдэ. Бу сырыыга саамай элбэхтик бэриллибит ыйытыынан бөһүөлэккэ гаас ситимэ кэлиитин тула киирдэ. Улууспутугар гаас киирэ илик нэһилиэгин дьоно кинилэргэ ымсыыра саныыллара чахчы. «Абыраммыт дьон» ‒ диэн эрдэхтэрэ. Оттон Лоомтукалар «күөх төлөн» кэлиитин күүтэллэр дуо? Кырдьык, аҕыйах сыллааҕыта гаас киириитин нэһилиэк салалтата да, олохтоохтор да күүскэ туруорсан кэлбиттэрэ. Уон сыллааҕыта бөһүөлэк арҕаа өртүгэр уонна бэйэлэрэ ааттыылларынан «аллараа дэриэбинэҕэ» «Армон» ХЭТ хочуолунайдары тутан сүрүннээн социальнай эбийиэктэри уонна биирдиилээн чааһынай дьиэлэри ититиигэ холбообута. Оттон былырыын саас «ЖКХ «Альтернатива» ХЭТ көмөтүнэн бөһүөлэк илин өртүгэр баар чааһынай дьиэлэр киинтэн ититиллэр хочуолунайга холбонон оһох оттуутуттан босхоломмуттара. Бүгүҥҥү күҥҥэ киинтэн ититиигэ уонна уу ситимигэр 176 ыал холбонон олорор. Оттон оһох оттон олорооччу 20-кэ ыал хаалбыт. Чааһынай дьон дьиэлэрин киинтэн ититиигэ көһөрөллөрүгэр үгүстэр кирэдьиит ылбыттарын, билигин аны гааска холбонууга эмиэ хаттаан ороскуокка киирэллэриттэн улаханнык мунаахсыйылларын эттилэр. Кинилэри эмиэ өйдүөххэ сөп. Ол эрэн хас биирдии дьиэҕэ гаас киириитэ үчүгэй бөҕө буоллаҕа. Сылы төгүрүччү аскын гааска буһаран электро-уокка, ититиигэ да төлөбүр ороскуота лаппа аҕыйыыр. Ырааҕы-киэҥи киэҥник ыраҥалаан, толкуйдаан бөһүөлэк бүттүүнэ «күөх төлөҥҥө» холбонноҕуна олохтоохтор олохторун хаачыстыбата өссө тупсарыгар саарбахтааһын суох. Былаан быһыытынан үүнэр сылга бөһүөлэк иһигэр гаас ситимин тардыы үлэтэ ыытыллыахтаах. Улуус баһылыга Дмитрий Тихонов өрөспүүбүлүкэ, улуус салалталарын өртүлэриттэн уонна Ил Түмэн дьокутаатттарын өйөбүллэринэн нэһилиэнньэҕэ туох көмө, өйөбүл көрүллүөн сөптөөҕөр үлэлэһиэхпит диэтэ.
Олохтоохтортон «КлиКра сокуонугар», тыа хаһаайыстыбатыгар, доруобуйа харыстабылыгар, социальнай көмүскэллээх буолууга кэлим киинигэр, о.д.а сыһыаннаах киирбит ыйытыыларга улуус баһылыга Дмитрий Тихонов, тыа хаһаайыстыбатын управлениетын салайааччыта Иннокентий Семенов, улуус кылаабынай бырааһа Иннокентий Павлов, киин исписэлииһэ Петр Неустроев, оройуон Сэбиэтин дьокутаата Мэхээс Масаха толору хоруйдары биэрдилэр. Мэхээс Масаха бэйэтин тус олоҕун холобуругар олоҕуран, ыччаттаргытын төрөөбүт түөлбэлэригэр олохсутарга дьиэ тиэргэниттэн саҕалаан кинилэри хаһаайын буола иитэн таһаарарарга сүбэтэ-амата дьон болҕомтотун тарта.
Этии быһыытынан оскуола хапытаалынай өрөмүөнүн ыытыы, хаарбах дьиэттэн көһөрүү бырагырааматын курдук тус сыалынан чааһынай дьиэҕэ олорор дьон дьиэлэрин өрөмүөннэригэр уон сылга биирдэ көмө көрүллэригэр, гааска киириинэн нэһилиэнньэ киэҥ ыҥырыылаах мунньах ыытыллыытын туруорустулар.
Ил Түмэн дьокутаата Олег Марков өрөспүүбүлүкэ кэлэр үс сыллааҕы бүддьүөтүн тыырыллыытын билиһиннэрдэ, быыбардааччыларыгар бэйэтин санаатын нэһилиэк инники сайдыытыгар тиэртэ. Улуус баһылыгын отчуотун мунньаҕын нэһилиэк баһылыга Руслан Афанасьев салайан ыытта.
Алена ДОКТОРОВА.
