Бүгүн, олунньу 14 күнүгэр, Саха Өрөспүүбүлүкэтин Бырабыыталыстыбатын отчуоттуур бөлөҕө Мэҥэ Хаҥаласка бүтэһик күнүн үлэлиир. Экономика миниистирэ Петр Попов салайааччылаах бастакы бөлөх бүгүҥҥү үлэтэ 1-кы Тыыллыма нэһилиэгиттэн саҕаланна.
Лоомтукаҕа култуура киинигэр 76 олохтоох ситэриилээх былаас 2024 сыллаах үлэтин отчуотун иһиттэ. Мунньаҕы киирии тылынан нэһилиэк баһылыга Руслан Афанасьев аста. Улуус баһылыга Дмитрий Тихонов отчуоттуур бөлөҕү билиһиннэрдэ.
Бөлөх салайааччыта, улууспут кураатара Петр Попов ситэриилээх былаас 2024 сыллаах үлэтин билиһиннэрэр дакылаатын олохтоохтор болҕойон иһиттилэр, ол кэннэ ыйытыыларга, этиилэргэ киирдилэр. Кинилэр нэһилиэк иһинээҕи уот ситимин кыамтата мөлтөҕүнэн сиип-хаабылга хаһан көһөрүн, Майа – Лоомтука суола хаһан өрөмүөннэнэрин, олохтоох бэйэни салайыныыга “КлиКра сокуонун”, тыа хаһаайыстыбатын бородууксуйатын оҥорон таһаарааччыларга көрүллэр өйөбүл, муниципальнай сулууспалаахтар хамнастарын үрдэтии, анал байыаннай дьайыыга сылдьар саха уолаттарын өйүүргэ туох үлэ ыытылларын, кинилэр дьиэ кэргэннэригэр сонотуоруйга, куруорка эмтэнэллэригэр көмө кээмэйин, чааһынай хаһаайыстыбалаахтар үүтү хайдах бэрээдэктээхтик туттарар буолуохтарын, сүөһү ноһуомун хайдах харайыахха сөбүн туһунан, «Аграстартап» куонкуруһун ирдэбиллэригэр чэпчэтии курдук, о.д.а. ыйытыылары биэрдилэр.
Тыа хаһаайыстыбатынан дьарыктанар дьон хамнаһыгар хотугу эбилик, оройуон кээписсийиэнэ курдук судаарыстыба өттүттэн өйөбүлү туруорсуохха диэн Виктор Корякин эттэ. Надежда Ларионова киэн туттар биир дойдулаахпыт академик В.П.Ларионов олорбут дьиэтигэр 2004 с.тэриллибит мусуой оһоҕунан оттуллан турарынан итиэннэ анал үлэһит көрүллүбэтинэн түмэли ититии ситимигэр холбуурга, хамнастаах үлэһити тутарга көрдөстө.
Лоомтукаҕа гаас кэлэн, сотору кэминэн бөһүөлэк иһинээҕи ситим тардыллан, ыаллар «күөх төлөҥҥө» холбонуохтара. Нэһилиэк илин өттүн олохтоохторо киинтэн ититии ситимигэр холбоммуттара сылтан орто. Бу дьон гааска киириигэ иккистээн ороскуот көрсүөхтэрин итиэннэ уу ситимиттэн араарыллыахтарын баҕарбаттарын туһунан санааны отчуоттарга иккис сылын этинэллэр. Бүгүн эмиэ Михаил Федоров бу тыын боппуруоска наһаа ыксаабакка дьаһаныахха диэн санаатын эттэ. Манна экономика миниистирэ Петр Попов гааска холбонуу ыалга бэйэтигэр уонна судаарыстыбаҕа ноҕоруусканы аччатыыга, кэлин тиһэҕэр олох хаачыстыбата тупсуутугар улахан оруолу ыларын сыыппараларга-чахчыларга олоҕуран быһааран биэрдэ, уу ситимин хаалларарга үлэлиэхтэрэ диэтэ.
Вера Винокурова бэтэринээрдэр хамнастарын үрдэтэри, Артем Алексеев урукку сыллаах тутуу дьиэтин хаарбах дьиэттэн көһөрүү бырагырааматыгар киллэрэри, Валентин Борисов үүт тутуллар сыанатын үрдэтэри, Светлана Захарова, Валентина Бурнашева киин балыыһаттан анал идэлээх быраастар тахсан нэһилиэнньэни көрүүнү тэрийэллэрин туруорустулар.
Быйыл боломуочуйа улуустарга бэриллэн, баһылыктары, дьокутааттары кытта дьүүллэһии, сөбүлэһии түмүгэр бородууксуйаны оҥорон таһаарыыга табыгастааҕын быһыытынан улуус үүт хайысхатын талбытын туһунан баһылык Дмитрий Тихонов сиһилии быһааран биэрдэ. Үүт тутуллар сыаната Бырабыыталыстыба туһааннаах уурааҕа таҕыстаҕына чопчуланыа диэтэ.
Эдэр дьону тыа сиригэр олохсутарга биир көдьүүстээх суолунан эдэр ыаллары дьиэнэн хааччыйыы бырагырааматын сааһынан хааччаҕын 36-тан 40 сааска диэри үрдэтии буолуо этэ диэн Мария Федорова этии оҥордо.
Светлана Николаева Хабаровскай куоракка олорор, анал байыаннай дьайыы кыттыылаахтарыгар көмөлөһөр кыыһыгар, бары билэр үтүө санаалаах волонтербутугар Алена Лебедкинаҕа өрөспүүбүлүкэ өттүттэн көмө баар буолуо диэн көрдөстө, түгэнинэн туһанан, мэлдьи өйүүр улуус дьаһалтатыгар, баһылыкка истиҥ махталын тиэртэ.
Түмүккэ отчуоттуур бөлөх салайааччыта Петр Попов бу уонна да атын киирбит этиилэри бэлиэтэнэн, олохтоохтор кыһалҕаларын үөрэтэн көрөн салгыы быһаарыыга үлэлиэхпит диэтэ. Бары кыттыыны ылбыт дьоҥҥо оробуочай бөлөх аатыттан махтанна, үүммүт сылга таһаарыылаах үлэни-хамнаһы, чэгиэн, түмсүүлээх, этэҥҥэ буолууну баҕарда.
Февронья ОХЛОПКОВА.
