Олунньу 10 күнүгэр Хорообут нэһилиэгэр тэрилтэлэр икки ардыларыгар,
Мэҥэ Хаҥалас улууһа төрүттэммитэ 95, Төрөөбүт тыл уонна сурук бичик күннэригэр анаан «МИН ДОЙДУМ ‒ МИН МЭҤЭМ» диэн коммерческэй өй-билии оонньуута ыытылынна.
Орто оскуола-саад кэлэктиибэ, «КоммунТехСервис», олохтоох дьаһалта, ОДьКХ, врачебнай амбулатория, МПЧ, норуот айымньытын дьиэтэ, «Хорообут» ХЭТ, «Алаас Ас», ТХПК, ветлечебница, «Армон», Арассыыйа Почтата, ИП түмсэн сомоҕо хамаандалары туруордулар. Хамаанда аайы биэстии киһи кытынна.
Күрэстэһэ кэлбит дьоммутун, көрөөччүлэри нэһилиэк баьылыгын солбуйааччыта Тамара Семенова эҕэрдэлээтэ.
Нэһилиэк бибилэтиэкэрэ Варвара Филиппова, оскуола бибилэтиэкэрэ Елена Птицына, сынньалаҥ киин үлэһитэ Миитэрэй уола Ньургун Бэчигэн бэрт киэҥ, элбэх салааны арыйар, интэриэһинэй боппуруостары бэлэмнээн, иилээн-саҕалаан ыыттылар.
Дьүүллүүр сүбэҕэ Тамара Семенова, Октябрина Васильева үлэлэстилэр.
Оонньуу түһүмэхтэрэ: «Кинилэри төһө билэҕин?», «Ийэ тылбыт ‒ барҕа баайбыт?», «Олорор дойдун кэрэ сирдэрин төһө билэҕин?», «Алаас» оонньуу.
Хамаандалар «Эрэл», «Мохсоҕоллор», «Сомоҕо» диэн анал ааттанан илин-кэлин түһүстүлэр. Түмүккэ оскуола хамаандата «Эрэл» бастаата. «Мохсоҕоллор» иккис, «Сомоҕо» үһүс буоллулар. Кыайыылаахтарга анал грамота, харчынан бириис, олохтоох дьаһалта аатыттан бэлэх туттарылынна. Улууспут төрөөбүт күнүгэр бэрт сэргэх тэрээһин ыытылынна. Кыттааччылар, көрөөччүлэр астынан, сынньанан тарҕастылар.
Октябрина Васильева.
