“Кыталык” үҥкүү норуодунай ансаамбыла үбүлүөйдээх 45 сылыгар анаммыт үгүс тэрээһиннэр түмүктэнэн эрэллэр.
Ансаамбыл өрөспүүбүлүкэ таһымнаах күрэхтэри, үгүс маастар-кылаастары ыытан, Илин эҥэр улуустарынан гастроллары тэрийэн, Дьокуускай куоракка, Майа сэлиэнньэтигэр улахан кэнсиэрдэри көрдөрөн, дьону түмтэ.
Аһаҕас өрөспүүбүлүкэтээҕи “Кыталык Куо” талааннаах кыргыттар икки ардыларыгар күрэх ыыттыбыт. Сөбүлэҥ ылынан, көрөөччүлэртэн киирбит үп-харчы анал байыанннай дьайыы кыттыылаахтарыгар, кинилэр дьиэ кэргэннэригэр көмө быһыытынан ананыа диэн мэктиэ тылбытын биэрбиппит. Кэрэ куолар үрдүк таһымнаах күрэхтэрин үгүс көрөөччү кэлэн сэргээбитэ бэлиэтэнэр.
Ол түмүгэр, дойдубут туһугар, эйэлээх олох иһин туруулаһа сылдьар анал байыаннай дьайыы кыттыылаахтарыгар “Кыталык” ансаамбыл 140 000 солкуобай суумалаах көмөбүтүн, уолаттарбыт этэҥҥэ дойдуларыгар эргиллэн кэлиэхтэрэ диэн эрэнэн туран, ыыттыбыт.
Светлана Никитина,
«Кыталык» оҕо-ыччат эстетическэй киинин фольклорга исписэлииһэ.