Бу күннэргэ «Кыталык» Арассыыйа үтүөлээх, Саха Өрөспүүбүлүкэтин норуодунай ансаамбыла төрүттэммитэ 45 сылынан ыаллыы улуустарынан гастролга сылдьар.
Үгүс оҕону-ыччаты үҥкүү кэрэ эйгэтигэр уһуйан иитэн таһаарбыт киэн туттар кэлэктииппитин көрөөччүлэр үөрэ-көтө көрүстүлэр, уруйдаан, ытыстарын тыаһын бэлэхтээтилэр. Амма уонна Уус Алдан улуустарыгар буолбут кэнсиэрдэр тустарынан көрөөччүлэр сэҥээриилэрин таһаарабыт.
«Амматааҕы Ф.Потапов аатынан норуот айымньытын дьиэтигэр сэтинньи 4 күнүгэр аар-саарга аатырбыт «Кыталык» Арассыыйа үтүөлээх, СӨ норуодунай ансаамбылын 45 сыллаах өрөгөйдөөх үбүлүөйүнэй кэнсиэрин көрөммүт дууһалыын сырдаан, санаалыын ырааһыран, кэрэҕэ тардыһар уйулҕабыт күүһүрэн, ис-испититтэн үөрдүбүт-көттүбүт!
Айар-тутар уустук идэҕэ, ол эрэн умсугутуулаах эйгэҕэ уһуйааччылар, тэрийээччилэр, артыыстар, оҕолор, төрөппүттэр биир санаалаах, сыаллаах, сомоҕолоһуулаах буолууларын – коллаборация күүһүн илэ көрдүбүт, сөхтүбүт-махтайдыбыт. Талааннаах, эрчимнээх эдэр хореографтар маастар кылаастарыгар үөрэннибит, уопуттарын үллэстэр дьоһуннаах тылларын-өстөрүн, элбэх туһалаах сүбэлэрин-амаларын иһиттибит.
Бииртэн биир кэрэ үҥкүүнү көрөммүт, ырыаны, тойугу, хомуһу истэммит, төрүт саха салгынын эйгэтинэн түөс муҥунан тыынаммыт ытыспыт тыаһа хабыллан олордо.
Ансаамбыл салайааччыта Василий Винокуров-Кыталык Баһылай идэҕэ, айар соргуга олоҕун тухары бэриниилээх өйүн-санаатын, ситиһиитин, чаҕылхай үлэтин астына көрдүбүт, уйулҕатын иҥэриннибит, хас биирдиибит олохпутугар туһаныахтаах чаҕылхай холобурбут буоларын өссе төгүл бигэргэттибит!
Өрөспүүбүлүкэбит улуустарынан бэлиэтиир ансаамбыл гастрольнай туурун иилээн-саҕалаан тэрийбит Мэҥэ Хаҥалас улууһун дьаһалтатын, култууратын, үөрэҕириитин салалталарыгар барҕа махталбытын, дириҥ убаастабылбытын тиэрдэбит!
«Кыталык» көтөр аартыгын суола өрүүтүн аһаҕас, киэҥ, сырдык уонна үйэлээх буоллун!
«Сир симэҕэ» көрдөрүүлээх, норуодунай ансаамбыл оҕолоро, төрөппүттэрэ, салайааччы Марианна Ефимова».
«1969, 1972, 1979 сыллардаахха Илин эҥэргэ тэриллибит, өрөспүүбүлүкэҕэ биллэр-көстөр, аар-саарга аатырбыт ансаамбыллар – Тааттаҕа «Доҕордоһуу», Уус Алдаҥҥа «Кэнчээри», Мэҥэ Хаҥаласка «Кыталык» ансаамбыллар бу кэлиҥҥи сылларга утуу-субуу өрөгөйдөөх үбүлүөйдэрин бэлиэтээтилэр.
Тэриллиэхтэриттэн бу ансаамбыллар оҕолоро туох баар өрөспүүбүлүкэ ыытар тэрээһиннэригэр, күрэхтэригэр бары бииргэ кыттар буолан, бэйэлэрин кэминээҕи оҕолорун кытта ол саҕаттан билсэн, доҕордоһон кэлэллэр, чугастык санаһаллар. Ол курдук бэҕэһээ биһиги улуустан 45 сыллаах үбүлүөйдээх гастролун саҕалаабыт доҕотторбут – «Кыталык» ансаамбыл кэлэн олус үчүгэй, саха норуотун култууратын, ис дууһатын таарыйар үҥкүүлэри көрдөрөн, кэнсиэртээн бардылар.
Ансаамбылы төрүттээччи, өрөспүүбүлүкэҕэ үҥкүү ускуустубата сайдыытыгар сүҥкэн кылаатын киллэрсибит, билигин даҕаны үлэлии-хамсыы, айа-тута сылдьар Василий Павлович Винокуров туруорбут үҥкүүлэриттэн саҕалаан, үлэлии сылдьар хореографтар аныгылыы, билиҥҥи олох, көрөөччү ирдэбилинэн туруоруллубут үҥкүүлэри Бороҕон олохтоохторо хас биирдии үҥкүүнү дохсун ытыс тыаһынан, «браво, бис!» хаһыынан уруйдаатылар-айхаллаатылар.
Түмүгэр Василий Павлович көрөөччүлэри туруоран, хас биир саха киһитэ барыта билэр, ылынар, норуоппут үҥкүүтэ буолбут, бэл, Дьокуускай куоракка Ленин болуоссатыгар уу үҥкүүлүүр Оһуорун үҥкүүлэтэн дьон-сэргэ астынан, үөрэн-көтөн тарҕаста.
Доҕотторбутугар «кыталыктарга» «кэнчээрилэртэн» эҕэрдэ! Буолаары турар өрөгөйдөөх үбүлүөйгүт, тэрээһиннэргит этэҥҥэ, үрдүк таһымҥа ааһалларыгар баҕарабыт».
