Алтынньы 27 күнүгэр Дьокуускайдааҕы 1 №-дээх оҕо ускуустубатын оскуолатыгар «Кырачаан виртуоз» диэн струналаах үнүстүрүмүөннэргэ толорооччуларга куонкурус ыытылынна (скрипкаҕа уонна виолончельга).
Быраабыла быһыытынан, хас биирдии бөлөххө күрэхтэһээччилэр иккилии этюд толордулар (ол иһигэр биирдэстэрэ – ирдэнэр).
Күрэхтэһээччилэр толорууларын дьүүллүүр сүбэ сыаналаата: О.Г.Кошелева – профессор, Муусука үрдүкү оскуолатын учуутала, Саха сирин ускуустубатын диэйэтэлэ; М.К.Рогова – Дьокуускайдааҕы 2 №-дээх оҕо ускуустубатын оскуолатын скрипка кылааһын учуутала, Саха Өрөспүүбүлүкэтин култууратын туйгуна; С.Т.Митькинова – Дьокуускайдааҕы 1 №-дээх оҕо ускуустубатын оскуолатын струннай салаатын салайааччыта.
Дьокуускайдааҕы 1, 2 №-дээх оҕо ускуустубатын оскуолаларытыттан, Муусука үрдүкү оскуолатын уонна М.К.Попова аатынан Майатааҕы оҕо ускуустубатын оскуолатын үөрэнээччилэрэ – уопсайа 24 үөрэнээччи араас бөлөххө кытынна.
Майатааҕы оҕо ускуустубатын оскуолатыттан струннай салаа үөрэнээччилэрэ кэтэхтэн кыттыыны ыллылар. Нарыйаана Олесова “Б” бөлөххө (кыра саастаахтар) 1-кы кылаастаах лауреат аатын ылла. Диана Бурнашева эмиэ “Б” бөлөххө 3-с кылаастаах лауреат буолары ситистэ. Оҕолору Саха Өрөспүүбүлүкэтин култууратын туйгуна Ванда Нестерева салайан бэлэмнээтэ, концертмейстер Саха Өрөспүүбүлүкэтин култууратын туйгуна Альфия Вахитова.
Эдэр мусукааннарга өссө да үрдүк ситиһиилэри баҕарабыт!
Прасковья Назарова,
М.К.Попова аатынан Майатааҕы оҕо ускуустубатын оскуолатын тэрийээччи бибилэтиэкэрэ.
