Эһигини барыгытын улууспут эр дьонун, салалтатын, дьокутааттарын Сэбиэтин ааттарыттан сандал саас маҥнайгы бырааһынньыгынан – Дьахталлар аан дойдутааҕы күннэринэн итиитик-истиҥник эҕэрдэлиибит!
Эһиги алаһа дьиэни өрүү сылааһынан угуттуур, араас эйгэҕэ таһаарыылаахтык үлэлиир-хамсыыр, уопсастыбаннай олоххо көхтөөхтүк кыттар күндү дьоммут буолаҕыт. Мындыр сүбэһит уонна истиҥ дьүөгэ буолаҥҥыт үрдүккэ, кыайыыга сирдиигит, биһигини, эр дьону, күүрээннээх үлэҕэ, кыайыыга-хотууга, ситиһиилэргэ кынаттыыгыт.
Сырдыгынан сыдьаайар сылаас сыһыаҥҥытынан, сайаҕас санааҕытынан, үтүө майгыгытынан, мындыр толкуйгутунан кэнчээри ыччаппытын төрүт үгэстэрбитигэр сыһыаран, дьиэ кэргэн сыаннастарын иҥэрэн иитэргит оҕолорбут үүнэн-сайдан тахсалларыгар, дойдуларын таптыыр, харыстыыр дьон буола улааталларыгар киллэрэр кылааккыт туохха да кэмнэммэт. Эһиги баар буолаҥҥыт бу орто дойдуга сырдык сыдьаайар, сүрэхпитигэр дьол уонна таптал уйаланар.
Унньуктаах уһун, тыйыс тымныылар кэнниттэн бастакы сылаас сардаҥалары кытта хас биирдии киһи сүрэҕэр сырдыгы сыдьаайар сандал саас кэрэһитэ, кэрэтэ буолбут кэрэ күҥҥэ хас биирдиигитигэр уонна чугас дьоҥҥутугар кытаанах доруобуйаны, чэгиэн-чэбдик туругу, этэҥҥэ буолууну баҕарабыт. Алаһа дьиэҕитигэр үөрүү-көтүү уйаланнын, ил-эйэ эҥээрдэстин, уйгу-быйаҥ үксээтин!
Дмитрий Тихонов,
улуус баһылыга.
Иннокентий Андросов,
оройуон дьокутааттарын
Сэбиэтин бэрэссэдээтэлэ.