Екатерина Иннокентьевна, Семен Николаевич Ноговицыннар ыал буолан, оҕо-уруу төрөтөн бу орто дойдуга дьоллоохтук, ньир-бааччы олорбуттара ахсынньы 12 күнүгэр 50 сыллара туолла. Үйэ аҥарын устата тапталларын кутаата күлүбүрүччү умайара уостубакка, сахалыы сиэринэн сэмэйдик уонна дьоһуннук олорон Балыктаах бөһүөлэгин биир ытык-мааны ыала буолаллар.
Дьиэ кэргэн баһылыга Семен Николаевич 1948 с. Балыктаах бөһүөлэгэр Күн сирин көрбүтэ. Тырактарыыстар куурустарыгар үөрэнэн идэ ылан Максим Горькай аатынан сопхуос Балыктаахтааҕы отделениетыгар 1970 сылтан илиитин араарбакка араас мааркалаах тыраахтардарга от-мас тиэйиитигэр, ыһыыга-хомуурга үлэ бөҕөтүн үлэлээбитэ. МТЗ-82 тыраахтары биэс сыл устата хапытаалынай өрөмүөнэ суох үлэлэтэн 1982 с. сопхуос дириэксийэтиттэн улахан суумалаах харчынан бириэмийэлэммитэ. 1985 с. «Мэҥэ» сопхуос тэриллэн дириэктэринэн Василий Герасимович ананан кэлбитэ. Сопхуос отделениеларыгар хаһаайыстыбаннай ньыманан тутуу үлэтэ күүскэ барбыта. Тутуу маһын Чыамайыкыттан Т-150 тыраахтардарынан таспыттара. Сопхуос иһинэн ЛМО (луго-мелеоративный отдел) тэриллэн онно Т-150 тыраахтарынан сир үлэтигэр, сүмэһиннээх сүөһү аһылыгын бэлэмнээһиҥҥэ күүстээх үлэ ыытыллыбыта. Бурдук, хомуур үлэтигэр, тиэйиигэ-таһыыга барытыгар үлэлээбитэ. Семен Николаевич ‒ чөмпүйүөн-тырахтарыыс, коммунистическай үлэ удаарынньыга, үлэ бэтэрээнэ, «Мэҥэ» нэһилиэгин Бочуоттаах олохтооҕо.
Дьиэ кэргэн күн күбэй ийэтэ Екатерина Иннокентьевна 1954 с. Күн сирин көрбүтэ. Аһыныгас санаалаах, амарах дууһалаах Екатерина Иннокентьевна Балыктаахтан харыс да сири халбарыйбакка интэринээккэ пуобарынан, оскуолаҕа техүлэһитинэн үтүө суобастаахтык үлэлээбитэ. Оскуола мэлдьи ыраас, сырдык буоларыгар, оскуола үүнэригэр-сайдарыгар бэйэтин кылаатын киллэрсибит бэтэрээн үлэһитэ буолар.
Билигин 50 сыл анараа өттүгэр 1974 с. ахсынньы 14 күнүгэр Сүрэх Тыаҕа төрөппүттэрин дьиэлэригэр чугас дьоннорун, доҕотторун ыҥыран уруу киэһээтин тэрийбит умнуллубат күннэрин долгуйа ахталлар, истиҥник саныыллар. Кинилэр биэс оҕоҕо күн сирин бэлэхтээбиттэрэ. Оҕолоро бары бу олоххо бэйэлэрин миэстэлэрин чиҥник булуммут, элбэх оҕолоох дьиэ кэргэн аатын сүгэн өрөспүүбүлүкэбит араас улуустарыгар олохсуйан үлэлии-хамсыы сылдьаллар. Минньигэс сиэттэрэ бэйэлэрин ситиһиилэринэн эһэлэрин, эбэлэрин сүрэхтэрин дьолунан толороллор. Екатерина, Семен дьиэ-уот туттан, үлэлээн-хамсаан нэһилиэктэрин олоҕор сэмэй кылааттарын киллэрсэн «Нагорнай» түөлбэ биир ытыктанар ыала буолаллар. Екатерина Иннокентьевна дьиэ-уот, сүөһү-ас түбүгүттэн быыс булан нэһилиэккэ ыытыллар бары тэрээһиннэргэ актыыбынайдык кыттар. «Доруобуйа»түмсүү чилиэнэ, уһун сыллар устата ыалдьар кэргэнин оҕо курдук бүөбэйдээн көрө-истэ сылдьар, кытаанах санаалаах сэмэй дьүөгэбит биһиэхэ холобур оҥостор киһибит буолар.
Екатерина Иннокентьевна уонна Семен Николаевич Орто дойдуга киһи буолбут ытык аналларын сиэрдээхтик толорон,аал уоту оттунан саха дьоһун-мааны ыала аатыран олорбуттара 50 сыла туолбутунан, кыһыл көмүс сыбаайбаларынан «Мэҥэ нэһилиэгэ» тыа сирин түөлбэтин баһылыга Александр Куприянов, баһылык солбуйааччыта Иван Мохначевскай кэлэн ис сүрэхтэриттэн эҕэрдэлээн туран Эҕэрдэ суруктары, бэлэхтэри туттардылар. Оҕолоро, сиэннэрэ мустан тапталлаах төрөппүттэрин, эһэлэрин-эбэлэрин кыһыл көмүс сыбаайбаларынан истиҥ эҕэрдэлэрин, барҕа махтал тылларын анаатылар.
Мария Захарова.
