Олунньу 19 күнүгэр Нөөрүктээйи нэһилиэгин мусуойугар Саха сиригэр пионерия тэриллибитэ 100 сылын бэлиэтиир үөрүүлээх түгэн буолла. Бу күн нэһилиэкпит араас сылларга пионер буола сылдьыбыт бэтэрээннэрбит ыалдьыттаатылар. Биһиги, Эдэр кыраайы үөрэтэр куруһуок оҕолоро кыһыл хаалтыс баанан, пилотка кэтэн бэтэрээннэри эҕэрдэлээн пионерия устуоруйатын сырдатар литературнай монтаж туруордубут. Биһиги нэһилиэкпитигэр бастакы пионерскай тэрилтэ 1931 сыллаах тэриллибит. Онно бастаан 9 оҕо пионерга киирбит. 1964 сылтан Павловскай орто оскуолатын пионерскай дружината Судаарыстыбаннай бириэмийэ лаурета Егоров М.Г. аатын сүкпүтэ. Кини дружина бочуоттаах пионера буолбута.
Араас кэмнэргэ пионер баһаатайдарынан үлэлээбиттэрэ: Сивцев Ф.К., Шевелева М.Р., Кычкина Г.Н., Кириллина С.М., Цыпандина Г.Н., Плюк Т.Г., Плюк Н.И., Бурнашева Н.Д.
Бу тэрээһиҥҥэ бэтэрээннэр сэбиэттэрин бэрэссэдээтэлэ Сивцева С.П. бэтэрээннэргэ өйдөбүнньүк бэлиэлэри туттарда. Урукку пионердар оҕо саастарын санаан пионерскай ырыалары ыллаатылар, оскуолатааҕы кэмнэрин ахтан ыллылар, маршировкалаан хааман көрдөрдүлэр. Бары пионердар өрөгөй ырыаларын «Взвейтесь кострами» ыллаатыбыт. Түмүгэр бары бииргэ хаартысткаҕа түстүбүт. Салайааччыларбыт Наталья Интеровна уонна Юлия Егоровна пионерия туһунан быыстапка оҥрбуттарын кэлбит дьон сэргээн көрдүлэр. Бары астынан тарҕастыбыт. Биһиэхэ , эдэр көлүөнэ ыччакка, бэтэрээннэрбит, урукку пионердар, үлэҕэ, үөрэххэ, успуорка, уопсастыбаннай үлэҕэ мэлдьи бэлэм буолуохтаахпытын өйдөттүлэр.
Анисимова Саргы, В.Н.Оконешников аатынан Павловскай орто оскуолатын 8 б кылаас үөрэнээччитэ
