Күөрэгэйбит олорор дойдутуттан – Исландияттан ыалдьыттар

Бүтэйдээхтэр Исландияҕа олорор биир дойдулаахпытын Александра Гаврильевна Аргунова-Күөрэгэйи Сахабыт сиригэр элбэх киһи билэр. Кинини Исландияҕа үчүгэйдик билсэр икки турист анаан кэлэн күүлэйдээн бардылар.

Биирдэрэ Аан дойдуга биллэр фотограф Рагнар Гудни Аксельссон-Ракс диэн. Кини Арктика күннэригэр анаммыт персональнай быыстапкатын Дьокуускайга А.Е.Кулаковскай – Өксөкүлээх Өлөксөй киинигэр аспыттар. Кини биһиги Бүтэйдээхпитигэр үһүс сылдьыыта. Бастаан Күөрэгэйдиин, онтон бэйэтэ, бу сырыыга эмиэ кини көрдөһүүтүнэн кэлбиттэр. Табаарыһа Европаҕа биллэр суруналыыс, фотограф Олавур Олавссон диэн.

Кэлэн баран Өлүөнэ очуостарыгар, Сиэбэн күөлгэ сылдьыбыттар. Кинилэри тылбаасчыт Радмир Айдарович Тахватуллин уонна Майаттан Күөрэгэй быраата Виктор Иннокентьевич Аргунов, Исландияҕа балтылаах Ульяна Спиридоновна Шишигина арыаллаан аҕаллылар.

Ыалдьыттарбытын маҥнай «Айхал» сынньалаҥ киинигэр көрүстүбүт. «Сырдыктар» арчыһыттар бөлөхтөрө омуктары алҕаан, ыраастаан, арчылаан көрүстүлэр Күөрэгэй ырыаһытын кэпсиирбитигэр Ньургуйаана Прокопьева, Варя Захарова сахалыы ырыа бэлэхтээтилэр. Аны Күөрэгэйбит худуоһунньугун бибилэтиэкэҕэ киирэн бэлэхтээбит хартыыналарын көрдөрдүбүт. Түмэллэр салҕыы таҥарабыт дьиэтин, мусуойбутун көрдөрбүт, кэпсээтибит. Ыалдьыттарбыт идэлэринэн хаартыскаҕа түһэрии бөҕө. Түмэлгэ Василий Афанасьевич Босиковы, Мария Кузьминична Гаврилованы, Федор Иванович Марковы, худуоһунньук Николай Павловы биллилэр. Саха култууратын, тутуутун интириэһиргииллэр. Исландияҕа аналлаах дьиэни сөхтүлэр, хайҕаатылар.

Биһиги Александра Гаврильевнаҕа – Күөрэгэйбитигэр эҕэрдэ ыыттыбыт, аны сайын күүтэрбитин эттибит. Арыаллыыр дьоммутун Аргуновтары, Шишигиннэри мусуойбут матырыйаалынан кэпсээтибит. Баҕа санааларын, сыанабылларын суруйан хааллардылар. Биһиги барыларыгар нэһилиэкпит кинигэтин бэлэхтээтибит. Түмүккэ оскуолаҕа тиийэн эбиэттээтилэр, оҕолору көрүстүлэр. Учууталлартан үстэ сылдьыбыт Рагнары оҕо эрдэхтэриттэн өйдүүр дьон баалларын сөхпүттэр. Күөрэгэй быраата оскуола дириэктэрэ Иннокентий Иннокентьевич Аргунов бэйэтэ английскайдыы эскурсиялаабыт, оҕолор хоһооннорун бэлэхтээбиттэр. Ыалдьыттар астынан сэлиэнньэни элбэхтик хаартыскаҕа түһэрэн барбыттар. Биһиги Күөрэгэйбит биир дойдулаахтарын көрсөн, солуннаах ыыппыппытыттан астынабыт.

 

Константин Родионов.