Алтынньы 5 күнүгэр Майаҕа Д.Ф.Ходулов аатынан норуот айымньытын дьиэтигэр Мэҥэ Хаҥалас улууһун култуура эйгэтин үлэһиттэрин Алтынньытааҕы сүбэ-мунньахтара ыытылынна.
Манна биһиги улууспут култуура эйгэтин: култуура дьиэлэрин, бибилэтиэкэлэр, түмэллэр, оҕо ускуустубатын оскуоларарын үлэһиттэрэ ааспыт 9 ыйга туох ситиһиллибитин, кэлэр кэмҥэ турар соруктары дьүүллэһэ муһуннулар.
Сүбэ-мунньахха кыттыыны ыллылар улуус баһылыгын социальнай боппуруостарга уонна имиджевэй бэлиитикэҕэ солбуйааччы Альбина Григорьева, улуустааҕы култуура уонна духуобунай сайдыы управлениетын начаалынньыга Анна Исакова, өрөспүүбүлүкэтээҕи норуот айымньытын дьиэтин сүрүн исписэлиистэрэ Артем Корякин, Аркадий Ефремов, СӨ национальнай бибилэтиэкэтин сүрүн бибилэтиэкэрэ Лариса Никифорова, Култуура уонна духуобунай сайдыы министиэристибэтин геокультурнай сайдыы институтун исписэлииһэ Григорий Прокопьев о.д.а.
Күн иккис аҥаарыгар быйыл улууска култуура эйгэтигэр саҥа үлэлии кэлбит эдэр исписэлиистэри чиэстээтилэр. Михаил Попов Дойду, Айтал Соловьев Төҥүлү нэһилиэктэригэр култуура кииннэрин уус-уран салайааччыларынан, Тускул Егоров Моорук нэһилиэгин Тамара Апросимова аатынан элбэх хайысхалаах киинин дириэктэринэн, Айал Юмшанов бу киин култуурунай тэрийээччитинэн, Егор Гоголев Холгума нэһилиэгин М.К.Попова – Эдьиий Марыына аатынан сынньалаҥ киинин звукооператорынан ананан кэллилэр. Светлана Елисеева Табаҕатааҕы оҕо ускуустубатын оскуолатын дириэктэрин солбуйааччынан, Юлианна Егорова М.К.Попова – Эдьиий Марыына аатынан Майатааҕы оҕо ускуустубатын оскуолатын флейта кылааһын преподавателинэн, Прасковья Назарова Бүтэйдээх нэһилиэгин сүрүн бибилэтиэкэринэн, Линда Захарова Д.Ф.Ходулов аатынан норуот айымньытын дьиэтин уус-уран салайааччытынан, Илья Бурнашев уот-күөс операторынан үлэлэрин саҕалаатылар. Култуура эдэр үлэһиттэригэр айымньылаах үлэни, ситиһиилэри баҕарабыт.
Иван Лукин.
