Аам—даам тымныылаах ахсынньы ый 12-13 күннэригэр Дьокуускай куорат Арчы Дьиэтигэр СӨ култууратын туйгуна, «Норуот уус-уран айымньытыгар кылаатын иһин» бэлиэ хаһаайына, Сунтаар улууһун уонна Түбэй нэһилиэгин ытык олохтооҕо, Саха сирин Дархан оһуокайдьыта, Бүлүү бөлөх улуустарын Дарханнар Дарханнара Михаил Михайлович Евсеев-Кураһаай Мэхээлэ 75 бэлиэ сааһыгар аналлаах «Куйаар уола Кураһаай түһүлгэтэ» өрөспүүбүлүкэтээҕи оһуокай күрэҕэ ыытылынна.
Икки күн тухары алаас ааттаахтара, улуус сурахтаахтара Сунтаар, Бүлүү, Ньурба, Үөһээ Бүлүү, Таатта, Чурапчы, Хаҥалас, Халыма, Нам, Мэҥэ Хаҥалас улуустарыттан уонна Дьокуускай куораттан бастыҥ оһуокайдьыттар мустан уран тылларын ууһун-уранын, кылыгырас кылыһахтарын маанытын, хоһуйар тылларын хомоҕойун иһитиннэрдилэр.
Мэҥэ Хаҥалас улууһуттан барыта уон эдэр оһуокайдьыттар: 1-кы Наахараттан Дьулустан Михайлов, Дьанхаадыттан Татьяна Неустроева, Марфа Аммосова, Төҥүлүттэн Сибэкки Заровняева, Табаҕаттан Галина Зыкова, Ороссолуодаттан Айаал Аммосов, кынатчыт Роман Иванов, Аллараа Бэстээхтэн Айта Васильева уонна бастыҥ оһуокайдьыттарбыт, Дархан этээччилэрбит Виталий Никифоров, Денис Оконешников уонна Станислав Иванов Саха сирин Дархан этээччилэрин кытары кытаанахтык киирсэн үрдүк ситиһиилэри ыллылар.
Дьабыыл нэһилиэгиттэн СӨ Дархан этээччитэ Денис Оконешников анал аат ылан үрүҥ көмүс кур ылла;
1-кы Тыыллыма нэһилиэгиттэн СӨ Дархан этээччитэ Виталий Никифоров 2-с үрдэл буолан 20000 солкуобайы ылла;
Майаттан СӨ Дархан этээччитэ Станислав Иванов 1 үрдэл буолан 25000 солкуобайы ылла.
Ааттаах-суоллаах оһуокайдьыттары кытта атах тэпсэн улууспут албан аатын ааттатар уус-уран тыллаах, добун тойуктаах Дархан этээччи уолаттарбытыгар Денис Оконешниковка, Виталий Никифоровка, Станислав Ивановка истиҥ эҕэрдэбитин этэбит!
Айта Васильева,
Гаврил Колесов аатынан Олоҥхо дьиэтин уус-уран салайааччыта.
