Бүгүн «Дьулуур» ыспартакыйаада иккис күнүн түмүгүнэн чэпчэки атлетика уонна буулдьанан ытыы сорох көрүҥнэригэр кыайыылаахтар быһаарылыннылар.
Биһиги улууспут сүүмэрдэммит хамаандатыттан чэпчэки атлетикаҕа көрбөттөргө В-1 көрүҥҥэ 100 миэтэрэҕэ эр дьоҥҥо Константин Шишигин (Лоомтука) 13, 95 сөк. көрдөрүүлээх бастаата. Итинэн кини улууспут хаамндатыгар бастакы кыһыл көмүс мэтээли аҕалла. Кинини сирдээн сүүрээччи (лидер) — Георгий Романов, тириэньэрэ — Василий Оленов.
В-2-3 көрүҥҥэ 100 миэтэрэҕэ биир дойдулаахпыт Людмила Пахомова (Майа) 16,85 сөк. кэлэн үһүс миэстэни ылла.
Санатан эттэххэ, Константин былырыын Бороҕоҥҥо ыытыллыбыт Саха сирин норуоттарын успуорка VIII Оонньууларын 100 уонна 400 миэтэрэҕэ чөмпүйүөнүнэн, оттон Людмила 200 миэтэрэҕэ чөмпүйүөнүнэн, 100 миэтэрэҕэ үрүн көмүс призерунан буолаллар.
Саҕалааһын баар. Хамаандабыт бу ситиһиилэринэн кынаттанан кинилэргэ өссө да кыайыылар кэлэ турдуннар!
Алена Докторова
