Сир-сир аайы чөл олоҕу, маассабай успуорду өрө тутар дьиэ кэргэннэр аҕыйаҕа суохтар. Кинилэр оҕолоругар, сиэннэригэр, биир дойдулаахтарыгар чэгиэн, чөл туруктаах буолуу, успуордунан утумнаахтык дьарыктаныы үгэһэ, бастатан туран, дьиэ кэргэнтэн тахсарын бэйэлэрин үтүө холобурдарынан көрдөрөллөр.
Кулун тутар 31 күнүгэр Аллараа Бэстээххэ Тимир Пинегин аатынан «Парус» успуорт уораҕайыгар аан бастакытын волейболга дьиэ кэргэн, аймахтыы кэрэ аҥаардар хамаандаларын икки ардыларыгар бастыыр иһин аһаҕас күрэхтэһии буолла.
Дьиэ кэргэн сылыгар анаммыт тэрээһиҥҥэ Амматтан Максимовтар, Пахомовтар; Мэҥэ Хаҥаластан – Егоровтар, Оконешниковтар, Свинобоевтар уонна Куприяновтар – дьиэ кэргэн хамаандалара кэлэн күөн көрүстүлэр, бастыыр иһин кииристилэр.
Бириистээх миэстэлэр хаһаайыннарынан ааттаннылар: Амма улууһун Соморсунуттан МАКСИМОВТАР дьиэ кэргэн 3-с миэстэ; Чыамайыкыттан КУПРИЯНОВТАР дьиэ кэргэн 2-с миэстэ; Амма Өнньүөһүттэн ПАХОМОВТАР дьиэ кэргэн ЧӨМПҮЙҮӨН үрдүк аатын сүктүлэр.
Ону таһынан бастыҥ оонньооччуларга анал ааттар иҥэрилиннилэр, харчынан бириэмийэлэр туттарылыннылар.
Күрэс кыттааччыларыгар, тэрийээччилэргэ баҕарабыт үрдүк ситиһиилэри, дьиэ кэргэннэригэр эйэни, чөл доруобуйаны, түмсүүнү.
