Суол кытыытыгар торуоскалаах киһи турар. Элбэх массыына быыстала суох сылдьар суолун туораары үрүҥ тайах маһын иннигэр тутан хамсатан, суоппардарга бэлиэ биэрэр. Массыына ыытааччылар үгүстэрэ ону бэлиэтии көрөн тохтоон, мөлтөхтүк көрөр киһи суолу туоруурун кэтэһэллэр. Оттон сорохтор өйдөөн көрбөккө ааһа тураллар.
Маннык түгэни, сэдэхтик да буоллар, куорат, тыа сирин да уулуссаларыгар көрүөххэ сөп. Ол иһин, көрбөт уонна мөлтөхтүк көрөр дьон кыһалҕатыгар уопсастыба болҕомтотун тардар сыалтан, алтынньы 15 күнүн Үрүҥ торуоска норуоттар икки ардыларынааҕы күнүн быһыытынан бигэргэппиттэрэ.
Биһиги улууспутугар сыллата алтынньы 15 күнүттэн саҕалаан Үрүҥ торуоска күнүгэр аналлаах киэҥ бырагыраамалаах ый ыытыллар. Быйыл Мэҥэ Хаҥалас улууһун көрбөттөрүн уопсастыбата тэрийэн ыытар ыйын чэрчитинэн уйулҕа үлэһиттэрэ уопсастыба чилиэннэригэр биирдиилээн трениннэри ыыттылар. Бастакытын Чурапчыга ыытыллыбыт Илин эҥэр улуустар уопсастыбаларын икки ардыгар голболга күрэхтэһиигэ биһиги улууспут эр дьоҥҥо хамаандата 2-с, дьахталларга 3-с бириистээх миэстэ буоллулар. Ону таһынан Майа дьаһалтатын өйөбүлүнэн көрбөт дьон ортотугар интеллектуальнай оонньуу ыытыллара, илиинэн оҥоһукка маастар кылаастар итиэннэ сэтинньи 15 күнүгэр ыйы түмүктүүр тэрээһин былааннаналлар. Ол туһунан биһиэхэ улуустааҕы көрбөттөр уопсастыбаларын бэрэссэдээтэлэ Иван Семенов иһитиннэрдэ. Кини нэһилиэктэргэ олохтоох дьаһалталар бу күннэргэ уопсастыба чилиэннэригэр үгэс быһыытынан муус ылан, муҥха соботуттан бэрсэн көмөлөһүөхтэрэ диэтэ.
Оттон бүгүн Майа сэлиэнньэтигэр улуус дьаһалтата, Госавтоинспекция, көрбөттөр уопсастыбалара кыттыылаах “Үрүҥ торуоска” аахсыйа ыытылынна. Мөлтөхтүк көрөр дьон суолу туоруулларыгар массыынаны ыытар дьон төһө болҕомтолоохторун, Суол быраабылатын 14.5 пуунунан мэктиэлэнэр бу доруобуйаларынан хааччахтаах дьон олохтоммут сиртэн атын да сиринэн суолу туоруулларыгар тохтоон, аһардар эбээһинэстээхтэрин төһө билэллэрин бэрэбиэркэлиир уонна өссө төгүл санатар сыаллаах тэрилиннэ. Элбэх сырыылаах уулуссаларга – Киин балыыһа Майатааҕы поликлиникатын уонна Д.Ф.Ходулов аатынан норуот айымньытын дьиэтин таһыгар ыытыллыбыт аахсыйаҕа, үөһэ этиллибитин курдук, суоппар үксэ үрүҥ тайахтаах көрбөт киһи иннигэр тохтоон, суолу туорууругар кыах биэрдилэр. Кинилэргэ көрбөттөр уопсастыбаларын исписэлиистэрэ Үрүҥ торуоска күнүн ыытыы сыалын-соругун, бу араҥа дьон кыһалҕаларыгар болҕомтолоох буолалларын санатар улуустааҕы социальнай көмүскэл управлениета бэлэмнээн оҥорбут өйдөтөр суругун туттардылар.
Бу аахсыйаны көҕүлээн тэрийбит муниципальнай оройуон баһылыгын социальнай боппуруостарга уонна имиджевэй бэлиитикэҕэ солбуйааччы Альбина Григорьева: “Бүгүҥҥү тэрээһин инники өттүгэр массыына уруулугар олорор дьон көрбөт, мөлтөхтүк көрөр, доруобуйаларынан хааччахтаах атын да дьон кыһалҕатыгар болҕомтолоох буолалларыгар туһалаах буолуо”, — диэн эрэнэрин эттэ. Оттон бу аахсыйа суоппардар суол быраабылатын билэллэрин көрдөрбүтүн туһунан Госавтоинспекция инспектора Родион Ксенофонтов иһитиннэрдэ.
Февронья ОХЛОПКОВА.
