Норуот тапталлаах артыыһын, “Көөчөөн көрө” мини-тыйаатыры төрүттээбит Аркаадьый Нуобукабы ахтыбат саха киһитэ суоҕа буолуо. Маныаха кини оонньоон, айан-тутан хаалларбыт “Сталин”, “Дездемона”, “Пааркаҕа”, “Репортер”, “Хаа”, о.д.а. нүөмэрдэрэ мэлдьи күүтүүлээхтэр.
Ахсынньы 7 күнүгэр Майаҕа Д.Ф.Ходулов аатынан култуура киинигэр “Көөчөөн көрө” мини-тыйаатыр 35 сыллаах отчуоттуур кэриэтэ “Күһүн ду? Кыһын ду? Ээ, дьэ көр” диэн көр-күлүү киэһэтин кэнсиэрэ буолла. Норуокка “Күлүү үйэни уһатар” диэн этии баар. Бу киэһэ көрөөччүлэр хас биирдии нүөмэртэн дуоһуйа күлэммит үйэбит, кырдьык, уһаата буолуохтаах. Манна Аркадий Новиков сценкаларын сэргэ, СӨ култууратын үтүөлээх үлэһитэ Анна Охлопкова салайааччылаах билигин үлэлии сылдьар кэлэктиип саҥа айбыт, омук суруйааччыларыттан тылбаастаабыт “Тылбаасчыт”, “Суут уурааҕа”, “Кекс”, “Роддом” сценкалара, клоунадалара көрөөччү биһирэбилин ылан, саала күлүүнэн ньиргийэн олордо. Талааннаах киһи барытыгар талааннаах. Бу киэһээ көр-күлүү артыыстара Улмас Федоров уонна Сардаана Алексеева бэйэлэрин ырыаһыт быһыытынан көрдөрөн, ытыс дохсун тыаһынан доҕуһуолланнылар.
“Көөчөөн көрө” мини-тыйаатыр салайааччыта Анна Охлопкова, Аркадий Новиков үөрэнээччилэрэ Афанасий Андреев, Аян Стручков, эдэр артыыстар Улмас Федоров, Сардаана Алексеева, Изабелла Слепцова, Акулина Митрофанова, Октябрина Варламова сырдык күлүүлээх оонньууларынан саҥа үүнэр сылы үөрэ-көтө көрсөргө, саҥаны айарга-тутарга көҕүлээн, сүргэбитин көтөхтүлэр.
Көрү-нары көҕүлүттэн туппут «Көөчөөннөр” дьон күлэриттэн-үөрэриттэн бэйэлэрэ да үөрэллэр.
Марелла Баишева.
