Дьокуускай куорат киинигэр алтынньы 19 күнүгэр киэһэ 17.00 чаастан А.Е.Кулаковскай аатынан норуоттар доҕордоһууларын дьиэтигэр Майатааҕы Аркадий Новиков тэрийбит “Көөчөөн көрө” норуодунай тыйаатыр, Горнай Мытааҕыттан “Дьиикимдэ дьээбэлэрэ” көр-күлүү бөлөҕүн доҕордуу кэнсиэрдэрэ көрөөччүлэр дохсун ытыстарын доҕуһуолунан үрдүк таһымҥа ааста.
Ыйыллыбыт чаастан хойутааһына суох, “лыык курдук” үгүс көрөөччүлээх саалаҕа, “Көөчөөн көрө” салайааччыта Анна Охлопкова, “Дьиикимдэ дьээбэлэрэ” салайааччыта Артур Егоров кэнсиэри иилээн-саҕалаан арыйдылар…
Икки чаас усталаах-туората тохтобула суох бииртэн биир сэргэх, бэһиэлэй нүөмэрдэртэн дьон күлүүтэ ньиргийэн олордо. “Дьиикимдэлэр” «Гастрол иннигэр», «Сатамматах эбиэт», «Уочаракка, «Уочарат кэннэ», «Өрөбүл күн”уо.д.а., “Көөчөөннөр” «Репортер», «Пааркаҕа», «Дездемона», «Бар бардым», «Хаа», “Сталин” сценкалары, монолог ааҕан, «Клоунада» көрдөрөн оруолга киирэн, туттан-хаптан, көрөн-истэн көрөөччүгэ тириэрдэрдии, итэҕэтиилээхтик оонньооннор дьон кутун тутуохтарын туттулар.
Артыыстар Анна Охлопкова, Артур Егоров, Аян Стручков, Афанасий Андреев, Сардана Алексеева, Диана Максимова, Акулина Митрофанова, Изабелла Слепцова, Владимир Егоров, Мия Егорова, Владимир Акимов, Сайыына Егорова, Евгений Акимов, Мотрена Матаннанова, Петр Стручков биирдиилээн оруоллара дьон хараҕар хатаммытын, өйүгэр санаатыгар олорон хаалбытын кэнсиэрт түмүктүүр чааһыгар хайҕаан, тоһоҕолоон эппиттэрэ дьону күллэрии уустук жанрыгар үлэлиир артыыстарга күүстэригэр күүс эптэ, сүрэхтэрин үөрүүннэн толордо.
кэнсиэр үрдүк таһымҥа ааһарыгар үгүс киһи үлэтэ киһи хараҕар быраҕыллыбакка хаалар, «көстүбэт фронт” үлэһиттэрэ дэнэллэр. Холобура: “Көөчөөн көрө” артыыһа Улмас Федоров кэмиттэн кэмигэр хойутаппакка муусуканан киэргэтэн, дьоллоох дьоро күнү видеоҕа уһулларын хааччыйда. Аркадий Михайлович Новиков эдэр доҕоро, Көөчөөннөр хас да киинэлэрин уһулбут,биллэр кинооператор Ион Иванов дьиибэлээх-дьээбэлээх түгэннэри мүлчү туппакка хаартыскаҕа түһэрэн үйэтиттэ.
Кэнсиэрт бүтүүтэ бөлөхтөр салайааччылара Анна Охлопкова, Артур Егоров күндү көрөөччүлэригэр, истиҥ истээччилэригэр бэйэлэрин анал Бириистэрин туттардылар, “баартаахтар” өттүк харалаах, илии тутуурдаах ырбайбыттарын ыһыктыбакка дьонноругар кэһиилээх барар буоллулар.
Айар үлэ абылаҥар ылларан, уһун сыллар устата дьону дьоллуу, дьоҥҥо үөрүүнү бэлэхтии сылдьар бу икки күүстээх бөлөхтөр быйылгы сылга “Көөчөөннөр” 35, “Дьиикимдэлэр” 25 сыллаах үбүлүөйдээх сыллара. Кинилэри эҕэрдэлии Мэҥэ Хаҥалас, Горнай улуустарын култуураҕа уонна духуобунай сайдыы салалтатын салайааччылара Анна Исакова, Вероника Быганова сибэкки дьөрбөтө тутуурдаах кэлэннэр, харчыннан сертификат туттардылар. Чахчы да үлэлэрэ түмүктээх буобутуттан үөрбүт-көппүт көрөөччү ытыс тыаһынан, ыһыыннан-хаһыыннан сэргиирин биллэрэ олороро көрүөхтэн кэрэ көстүү буоллаҕа.
«Көөчөөн көрө” норуодунай тыйаатыр күндү көрөөччүлэрин, Аркадий Новиков үлэтигэр сүгүрүйээччилэрин, сэтинньи 13 күнүгэр Дьокуускайга А.Е.Кулаковскай аатынан норуоттар доҕордоһууларын дьиэтигэр Аркадий Михайлович Новиковка аналлаах “Кыра Сталин” ахтыы киэһэтигэр ыҥырар.
Сардана Алексеева, Саха Өрөспүүбүлүкэтин култууратын туйгуна, үлэ бэтэрээнэ, “Көөчөөн көрө” мини-тыйаатыр артыыската.