Сурутааччыбыт, Майа сэлиэнньэтин Нагорнай уулуссатыгар олорор үлэ бэтэрээнэ Любовь Николаевна Охлопкова мэлдьи Кыайыы монуменын аттынан, “Таптал көлүччэтин” кэрэхсии көрбүтүнэн түһэр, сылдьар суола.
Кини алтынньы 22 күнүгэр эбиэт диэки, уот барар диэн биллэриини истэн, маҕаһыыҥҥа чүмэчи ылаары сыырын түһэн иһэн эмискэ охтон, саҥа түспүт хаарга сирэйинэн кэлэн түспүт. Өйүн сүтэрбэтэх. Олоро түһээт, муннун хаана кэлбитин сотто олорон өйдөөн көрбүтэ аттыгар кыыс кэлэн турара. Кини “Хайдаххыный?” диэн сураһан баран турарыгар көмөлөспүт. Любовь Николаевна махтанан баран, бэргэһэтэ түспүтүн ылан кэтиэх буолбута, өлөрбүт илиитэ хамсаппат буолбут. Ону көрөн кыыс тута массыына ыҥыран “Суһал көмөҕө” илдьэн биэрбит.
Манна рентгеннээн, хаҥас саннын уҥуоҕа алдьаммыт диэн уустук эпэрээссийэҕэ анаабыттар. 25 чыыһылаҕа эпэрээссийэлээн, икки нэдиэлэ травматология отделениетыгар сытыаран эмтээбиттэр. Билигин таһыттан бэрэбээскигэ сылдьан эмтэнэр.
Бу чэппиэргэ эрэдээксийэттэн хаһыатын ыла кэлэ сылдьан көмөлөспүт кыыспар махтаныахпын олус баҕарабын да, аатын ыйыппакка хаалбыппын диэн хомойор бүччүм санаатын быктарда.
Бу ыарахан кэмигэр тута көмөлөһөн балыыһаны булларбыт кыыһыгар, ону тэҥэ эмтээбит быраастарыгар Алексей Старостиҥҥа, Дмитрий Макаровка эмтэнээччи тапталлаах хаһыатын нөҥүө барҕа махталын тиэрдэр.
Марелла Баишева.