Ытыктабыллаах биир дойдулаахтарбыт, улууспут олохтоохторо!
Билигин социальнай ситимнэринэн араас таһаарыы элбээбит кэмигэр, хаһыаппытыгар сурутууну көҕүлээччилэрдээх итиэннэ өйөөччүлэрдээх буоламмыт, хаһыат тахсар ахсаана аҕыйаабакка иһэр.
2025 сылга дойду үрдүнэн Улуу Кыайыы 80 сыла бэлиэтэниэҕэ. Бу дьоһун үбүлүөйдээх сылы көрсө улууспут “Эркээйи” хаһыатыгар сурутан ааҕаргытыгар ыҥырабыт. Түгэнинэн туһанан, тыа сирин түөлбэтин дьаһалталара нэһилиэктэригэр олорор тыыл бэтэрээннэригэр сыллата сурутуу бэлэхтиир үтүө үгэстэрэ олохтонон, биһиги аҕам саастаах көлүөнэбит улууһун хаһыатын ааҕа олороругар олохтоох дьаһалталарга барҕа махталбытын тиэрдэбит.
2025 сылы көрсө «Бэтэрээҥҥэ суруттар” аахсыйабыт салҕанар. Манна ким баҕарар улууһун хаһыатын сурутан аҕам саастаах дьоммутугар, биир дойдулаахтарбытыгар, үлэ, тыыл бэтэрээннэригэр, ону тэҥэ анал байыаннай дьайыы кыттыылаахтарын дьиэ кэргэннэригэр үөрүүнү бэлэхтиэн сөп.
Сыллата ыытыллар аахсыйаҕа куруутун кыттар, өйүүр успуонсардарбытыгар истиҥ махталбытын биллэрэбит. Ил Түмэн дьокутаата Андрей Находкин, урбаанньыт Руслан Федотов сыллата 10-нуу үлэ бэтэрээнигэр сыллааҕы сурутууну бэлэхтээн кэллилэр. Бу сылга Ил Түмэн дьокутааттара Олег Марков 12, Захар Никитин 5, Тихон Скрябин 3 анал байыаннай дьайыыга сылдьар байыастар дьиэ кэргэннэригэр сурутуу бэлэхтээбиттэрэ. Өр сыл норуот дьокутаатынан үлэлээбит Юрий Баишев сыллата биир дойдулаахтарыгар Лоомтука олохтоохторугар 4-түү бэтэрээҥҥэ успуонсардыыр. Кинилэргэ барҕа махталбытын биллэрэбит.
Биирдиилээн урбаанньыттар: Майаттан “Вилена” маҕаһыын Дьабыыл нэһилиэгин биэс ыалыгар, “Талер” маҕаһыын хаһаайына Дмитрий Катакинов Майа сэлиэнньэтин икки ыалыгар сыллааҕы сурутууну хаһыс да сылларын бэлэхтээтилэр.
Балыктаах нэһилиэгин олохтоох дьаһалтын баһылыга Александр Куприянов, баһылыгы солбуйааччы Иван Мохначевскай, бэтэринээр учаастага биир дойдулаахтарыгар биирдии сурутуу биэрбиттэрэ. Догдоҥо нэһилиэгиттэн дьокутаат Иван Пивоваров 2, уопсастыбаннай кэрэспэдьиэн Светлана Иванова 2, Майаттан Инна Николаева 1 үлэ бэтэрээнигэр, 1975 сыллаахха Төҥүлү орто оскуолатын 10 «б» кылааһын бүтэрбиттэр 4 анал байыаннай дьайыы кыттыылааҕын дьиэ кэргэнигэр сыллааҕы сурутууну бэлэх ууммуттарын махталынан ахтабыт.
“Эркээйи” хаһыат эрэдээксийэтэ бэйэтин ааҕааччыларыгар сонуннары сойуппакка таһаарарга итиэннэ күнүгэр тиэрдэргэ кыһаллар. Онон сибээстээн, Майатааҕы “Түмэн” уопсастыбаннай сүбэ салайааччыта Мария Лукина көҕүлээһининэн тэриллибит “Эркээйи волонтердара” хамсааһын үһүс сылын үлэлиир. Манна эдэр ийэлэр Акулина Устинова, Евдокия Заровняева, Саргылана Васильева уонна Полина Осипова үлэлэрин быыһыгар хаһыаты тахсыбыт күнүгэр чэппиэргэ ылан аадырыстарынан тиэрдэргэ кыһаллан сүүрэллэр-көтөллөр. Быйыл күһүҥҥүттэн кинилэргэ Любовь Дьячкова эбилиннэ.
Мэлдьи өйүүр успуонсардарбытыгар уонна сүүрүүнэн сылдьар иһирэх санаалаах волонтердарбытыгар махталбыт муҥура суох, салгыы даҕаны бииргэ үлэлиэхпит диэн эрэнэбит.
Үүнэр 2025 сылга сурутуу хампаанньата алтынньы ыйтан саҕаламмыта. Хаһыаппыт сыаната эрэдээксийэттэн ылыыга 6 ыйга – 528, сылга 1056, электроннай аадырыска сурутууга 6 ыйга 582, сылга 1164 солк. Маны сэргэ, почта бары отделениеларыгар сурутуу ыытыллар.
“Эркээйи” хаһыаты эрэдээксийэттэн ылыыга уонна электроннай аадырыска сурутуу эргиччи барар. Маны сэргэ, “УлусМедиа” сайтаахпыт, “@gazetaerkeii” телеграм ханааллаахпыт.
“Эркээйини» сурутан ааҕыҥ, «Эркээйилиин» бииргэ буолуҥ!”.
Эрэдээксийэ.
