Олунньу 6 күнүгэр Дьокуускай куоракка СӨ Киин быыбардыыр хамыыһыйата өрөспүүбүлүкэбит сиригэр-уотугар баар 35 территориятааҕы быыбардыыр хамыыһыйалар бэрэссэдээтэлллэригэр быйыл кулун тутарга ыытыллар РФ Бэрэсидьиэнин быыбарыгар бэлэмнэнии уонна тэрийии үлэтин соруктарыгар сэминээр ыытта.
Тэрээһин үөрүүлээх чааһыгар СӨ Киин быыбардыыр хамыыһыйатын бэрэссэдээтэлэ Евгений Федоров Мэҥэ Хаҥаластааҕы быыбардыыр хамыыһыйа бэрэссэдээтэлигэр Ирина Назароваҕа «Быыбардар тэрээһиннэригэр үтүөлэрин иһин» РФ Киин быыбардыыр хамыыһыйатын бочуоттаах бэлиэтин туттарда. Бу бочуоттаах бэлиэ РФ Киин быыбардыыр хамыыһыйатын үрдүкү наҕараадатынан буолар.
Кини быыбары тэрийии, ыытыы эппиэттээх тэрээһиннэригэр үлэлээбитэ быйыл 23-с сылыгар барда. Бастаан 2001 сыллаахха Хотугу Майатааҕы учаастактааҕы быыбардыыр хамыыһыйаҕа биир сыл чилиэнинэн, иккис сылыттан бэрэссэдээтэлинэн ананан үлэлээбитэ. Оттон 2010 сылтан күн бүгүҥҥэ диэри ‒ Мэҥэ Хаҥаластааҕы быыбардыыр хамыыһыйа бэрэссэдээтэлэ.
Ирина Егоровна улахан эппиэттээх салааҕа өр сыллаах таһаарыылаах үлэтэ үрдүктүк сыаналаммытынан истиҥник эҕэрдэлиибит уонна инники үлэтигэр ситиһиилэри баҕарабыт.