Ил Дархан Анал этиитэ
Мэҥэ Хаҥалас улууһун киин балыыһатын кылаабынай бырааһа Иннокентий Павлов:
‒ Саха Өрөспүүбүлүкэтин Ил Дархана Айсен Николаев СӨ Судаарыстыбаннай мунньаҕар (Ил Түмэҥҥэ) сыллата Анал этиитин тиэрдэр. Өрөспүүбүлүкэ баһылыга этиитигэр ааспыт сыл түмүктэригэр, бэлиэ түгэннэригэр тохтоото. Сайдыы стратегическай хайысхаларын ырытта, Парламент, Бырабыыталыстыба уонна олохтоох былаас уорганнарын үлэлэригэр тохтоото.
2018 сылтан өрөспүүбүлүкэҕэ доруобуйа харыстабылын салаатыгар 109 эбийиэк үлэҕэ киллэриллибитэ бэлиэтэннэ. Бу көннөрү көрдөрүү буолбатах ‒ медицинскэй көмөнү оҥорууга хаачыстыба уонна сөптөөх усулуобуйа олохтонуутугар тосту уларыйыылар киириилэрин быһыытынан сыаналанар. Өрөспүүбүлүкэ Бырабыыталыстыбата тыа сиригэр доруобуйа харыстабылын сайдыытыгар итинник болҕомтону уурар. Быйыл Хонууга, Чурапчыга, Уус Маайаҕа балыыһа комплекстара аһылыннылар. Итинник тутуулар Майаҕа, Сангаарга, Намҥа, Ньурбаҕа, Бүлүүгэ уонна Үөһээ Бүлүүгэ тутуллаллар. Аммаҕа уонна Дьокуускайга 2 №-дээх поликлиника дьиэлэрин тутуу түмүктэнэн эрэр. Онон хас биирдии салаа үлэһит миэстэтигэр турунан үлэлээтэҕинэ оройуоммут сөптөөх сайдыытыгар бииргэ тиийиэхтээхпит диэн санааны үөскэттэ.
2025 с. доруобуйа харыстабылыгар саҥалыы сайыннарыы «Продожительная и активная жизнь», «Семья» национальнай бырайыактар истэринэн салҕаныахтаах. Үөрүөхпүт иһин, өрөспүүбүлүкэ баһылыга биһиги эрэгийиэммит Уһук Илиҥҥэ нэһилиэнньэбит тэтимнээхтик эбиллэн иһэрин бэлиэтээтэ, 1007500 киһиэхэ тэҥнэспиппит.
Тыа сиригэр доруобуйа харыстабылын салаатыгар миэстэтиттэн тутулуга суох сыыппара технологията киэҥник туһаныллыахтааҕа этилиннэ. Оҕону көрөр-истэр биригээдэлэр мобильнай медицинскэй оборудованиенан уонна тырааныспарынан хааччыллыахтаахтар. Онон оҕо аймахха күүстээх болҕомто ууруллара сорох боппуруостарга чопчуланна. Айсен Николаев Доруобуйа харыстабылын уонна Экэниэмикэ министиэристибэлэригэр кэлэр үөрэх сылыттан оскуолаларга медиктэр баар буолууларын ситиһэргэ тоһоҕолоон бэлиэтээтэ. Ити нэһилиэнньэни кыра сааһыттан доруобуйатын туругун көрөргө-истэргэ олук буолуохтаах.