Аччыгый уонна орто биисинэскэ
Сыл ‒ хонук дииллэрэ чахчы. Оруобуна сүүрбэ сыллааҕыта Руслан Федотов Аллараа Бэстээх бөһүөлэгэр Ленин аатынан киин уулуссатыгар бастакы маҕаһыына аһыллыбыта. Бэрт соторутааҕыта эрэ курдук этэ да, ол кэмтэн баһаам хаар ууллубут эбит. Ол бэлиэ тэрээһин туһунан «Эркээйи» хаһыат» 2004 сыл ахсынньы 3 күнүнээҕи нүөмэригэр «Саталлаахтар сарсыҥҥынан салайтараллар» диэн ааттаабыт ыстатыйабар сырдатан турардаахпын. Руслан Федотов, кырдьыга да, оччолортон саталлаах салайааччы буолан кэскиллээх соруктары туруорунан сарсыҥҥынан салайтаран бүгүҥҥү күҥҥэ өрөспүүбүлүкэҕэ биир бөдөҥ урбаанньыт буола үүннэҕэ.
Руслан Еремеевич урбаанньыт быһыытынан үлэтэ-хамнаһа 1998 сыллаахтан Амматтан саҕаламмыта. 2004 сыллаахтан аҕатын дойдутугар, Мэҥэ Хаҥаласка, улахан айан суолларын аартыктарыгар Аллараа Бэстээххэ олохсуйан эргиэн кииннэрин арыйан үрдүк таһаарыылаахтык үлэлии сылдьар. Бүгүҥҥү күҥҥэ кини аатын, салайар тэрилтэтин өрөспүүбүлүкэ бүттүүнүгэр билбэт киһи, бука, суоҕа буолуо. Саха сиригэр тыа хаһаайыстыбатын тиэхиникэтин, тутуу уонна хаһаайыстыбаннай табаардары хааччыйыыга биир бөдөҥ эргиэн тэрилтэтинэн киэҥник билиннэ. Биир атыы дьиэтиттэн саҕаламмыт эргиэн эйгэтэ ыыра кэҥээн билигин «Руслан» диэн маҕаһыыннар ситимнэрэ Аллараа Бэстээҕи таһынан Дьокуускай куоракка, Амма, Чурапчы улуустарыгар баар буоллулар. Маҕаһыыннар үлэлиир хайысхалара киэҥинэн, табаардара арааһынан, хаачыстыбалара эппиэттэһэринэн атыылааччыны тардаллар. Манна тыа хаһаайыстыбатын улахан тиэхиньикэлэриттэн саҕалаан дьиэҕэ-уокка туттуллар табаарга, миэбэлгэ тиийэ барыта атыыланарын бары бэркэ билэҕит.
Руслан Федотов ахсынньы 4 күнүгэр, төрөөбүт күнүгэр, бэйэтин саҥа атыы эргиэн кииннэрин аһыллыыларын тэрийиитэ кэлин сылларга үтүө үгэскэ кубулуйда. Быйыл эмиэ ити күн Аллараа Бэстээххэ грузовой массыыналар уонна анал тиэхиньикэлэр саппаас чаастарын атыылыыр маҕаһыын аһыллыытын үөрүүлээх тэрээһинэ буолан ааста.
‒ Олох сайдыытынан омук сирдэригэр, тас дойдуларга оҥоһуллубут улахан кыамталаах тиэхиньикэ, массыына элбээтэ. Сотору кэминэн Өлүөнэ өрүс муостата тутуута саҕаланан араас улахан тиэхиньикэ кэлиэҕэ. Онно бэлэмнэнэн биһиги кинилэргэ саппаас чаастары атыылыыр саҥа маҕаһыын астыбыт. Саппаас чаастарынан хааччыйыыга собуоттары кытары быһаччы үлэлэһэн дуогабардары түһэристибит. Сакааспыт аҥаара кэллэ. Саҥа дьыл кэннэ толору кэлэрин күүтэбит, ‒ диир Руслан Еремеевич.
Биллэрин курдук, Руслан Федотов тэрилтэтэ Арассыыйа эрэ буолбакка, Беларусь Өрөспүүбүлүкэтин улахан собуоттарыгар официальнай дилер буолбута элбэх сыл буолла. Онон атыылыыр табаара оҥорон таһаарааччыттан быһа кэлэр буолан, хаачыстыбатыгар да, сыанатыгар да сүүйүүлээх.
Саҥа атыы киинин аһыллыытыгар ыраахтан-чугастан үгүс киһи тоҕуоруһа муһунна. Руслан Еремеевиһи, кини салайар сүүстэн тахса киһилээх үлэһит кэлэктиибин үөрүүлээх түгэнинэн эҕэрдэлии биир дойдулаахтара ‒ Амма улууһун баһылыга Степан Кузьмин салайааччылаах улуус нэһилиэктэрин баһылыктарын, управлениеларын, тэрилтэлэрин салайааччыларын дэлэгээссийэтэ, Чурапчы улууһун баһылыга Степан Саргыдаев, Мэҥэ Хаҥалас оройуонун Сэбиэтин бэрэссэдээтэлэ Иннокентий Андросов, «Аллараа Бэстээх бөһүөлэгэ» куорат түөлбэтин баһылыгын солбуйааччы Ирина Егорова, улууспут кэккэ тэрилтэлэрин, хаһаайыстыбаларын салайааччылара, СӨ Ил Түмэнин Тутууга, олорор дьиэ-уот хаһаайыстыбатыгар уонна энэргиэтикэҕэ бастайааннай кэмитиэт бэрэссэдээтэлэ Александр Корякин, СӨ Урбааҥҥа, эргиэҥҥэ уонна туризмҥа министиэристибэтиттэн Саргылана Николаева, «НХЗ ГРУПП» производственнай хампаанньа генеральнай дириэктэрэ, «Дьөһөгөй» хаһаайыстыба салайааччыта Вячеслав Нестеров о.д.а кэллилэр.
Бу күн Руслан Еремеевич уонна кини салайар кэлэктиибин аатыгар махтал үтүө тыллара, баҕа санаа бастыҥа этилиннэ. Үгүс Махтал суруктар, грамоталар, анал бэлиэлэр туттарылыннылар. Руслан Федотов бөһүөлэк социальнай-экономическай сайдыытыгар үтүөлэрин иһин «Аллараа Бэстээх бөһүөлэгин Бочуоттаах гражданина» аатын сүктэ. Үйэ чиэппэриттэн ордук кэмҥэ үлэлээн кэлбит тэрилтэ бастыҥ үлэһиттэрэ өр сыллаах үлэлэрэ сыаналанан үрдүк наҕараадаларынан бэлиэтэннилэр. Атыы-эргиэн кииннэрин ситимин сэбиэдиссэйэ Ирина Слепцова СӨ Ил Дарханын Грамотатынан, менеджер Николай Кондаков «СӨ Тыатын хаһаайыстыбатын туйгуна» бэлиэнэн наҕараадаланнылар. Кэккэ үлэһиттэр Ил Түмэн Бастайааннай кэмитиэтин, министиэристибэлэр, улуустар баһылыктарын Махтал суруктарынан, анал бэлиэлэринэн бэлиэтэннилэр.
Саҥа маҕаһыын аһыллыытын үөрүүлээх күнэ эмиэ ахсынньыга ыытыллар үтүө үгэскэ кубулуйбут тэрээһининэн ‒ Саҥа дьыллааҕы харыйа уотун уматыынан түмүктэннэ.
«Руслан» атыы-эргиэн киинэ дьон-сэргэ туһугар инникитин да үүнэ-сайда, кэҥии турдун!
Алена ДОКТОРОВА.
