Алтынньы 29-30 күннэригэр Майаҕа Арассыыйаҕа Дьиэ кэргэн, Саха сиригэр Оҕо саас, Мэҥэ Хаҥалас үөрэҕириитин 150 сылларыгар ананар Илин эҥэр улуустар үөрэх эйгэтин үлэһиттэрин 37-с ыспартакыйаадалара ыытылынна.
«Манчаары» успуорт киинигэр Амматтан, Уус Алдантан, Тааттаттан, Чурапчыттан, Мэҥэ Хаҥаластан уопсайа 200-тэн тахса үөрэх эйгэтин үлэһиттэрэ 2 күн устата күрэхтэстилэр.
Бэлиэ тэрээһинин кыттыылаахтарын улуус баһылыга Дмитрий Тихонов, СӨ Биир идэлээхтэр сойуустарын информационнай отделын начаалынньыга Анна Попова эҕэрдэлээтилэр, успуорка, уопсастыбаннай үлэҕэ бастыҥнарга наҕараадалары туттардылар.
Салгыы волейболга, остуол тиэнниһигэр, саахымакка, дуобакка, хабылыкка, хаамыскаҕа, дартска, буулдьанан ытыыга, ханаат тардыһыытыгар, хапсаҕайга биирдиилээн уонна хамаандадан бастыыр иһин сытыы киирсиилэр буоллулар.
— Үтүө үгэс буолбут Илин эҥэр улуустар үөрэх эйгэтин үлэһиттэрин быйылгы, 37-с ыспартакыйаадата, Мэҥэ Хаҥалас үөрэҕириитин 150 сылыгар сөп түбэһэн, биһиги үөрүүбүтүгэр улууспутугар ыытыллар уочарата буолла. Сыллата ыспартакыйааданы ыытар улуус тэрээһин балаһыанньатыгар кэккэ уларытыылары киллэрэр. Бу аҥаардас күөн күрэс эрэ буолбакка, биһигини сомоҕолуур доҕордоһуу түһүлгэтэ буолар. Илин эҥэр улуустар үөрэх ситимин сайдыытыгар төһүү күүс буолар сыаллаах тэрээһини сылын ахсын тэрийэбит. Онуоха күрэхтэһиинэн эрэ буолбакка, үөрэх тэрилтэлэрин, эбии үөрэхтээһин кииннэрин, оҕо уһуйааннарын үлэлэрин билсэн, бэйэ-бэйэбитигэр көмөлөһөбүт, уопут атыстаһабыт, – диэн улуустааҕы үөрэх управлениетын начаалынньыга Гаврил Толстяков иһитиннэрдэ.
Икки күннээх күрэхтэһии түмүгүнэн 20 очукуолаах Мэҥэ Хаҥалас хамаандата бастаата. Иккис миэстэҕэ Уус-Алдан (28 очукуолаах), үһүскэ Амма (32 очукуолаах) хамаандалара тигистилэр.
Иван Лукин.
