Майаҕа Ф.Г.Охлопков аатынан орто оскуолаҕа уонна «Манчаары» успуорт уораҕайыгар кулун тутар 29-30 күннэригэр хараҕынан мөлтөхтүк көрөр инбэлииттэр Илин эҥэрдээҕи култуура уонна успуорт көрүҥнэригэр инклюзивнай бэстибээллэрэ 2 күн устата үрдүк таһымнаахтык тэриллэн ыытылынна.
Василий Пономарев Чурапчы, Петр Башарин Таатта, Александра Устинова Амма, Дмитрий Аммосов Уус Алдан уонна Иван Семенов Мэҥэ Хаҥалас хамаандаларын салайан аҕалбыттар. Тэрээһин кыттыылаахтарын өрөспүүбүлүкэтээҕи көрбөттөр уопсастыбаларын бэрэссэдээтэлэ Ибрагим Ишниязов, Мэҥэ Хаҥалас улууһун баһылыгын социальнай уонна имиджевай бэлиитикэҕэ солбуйааччы Альбина Григорьева, социальнай көмүскэллээх буолуу управлениетын начаалынньыга Иван Шестаков, улуустааҕы көрбөттөр уопсастыбаларын бэрэссэдээтэлэ Иван Семенов уонна социальнай бэлиитикэ управлениетын салайааччы Октябрина Кулешова эҕэрдэлээтилэр. Бу күннэргэ Ф.Г.Охлопков аатынан орто оскуола үөрэнээччилэриттэн волонтердар үлэлээн ыалдьыттары сааларынан сирдээн сырыттылар.
Күрэхтэһиилэр бэйэни билиһиннэрии, айар дьоҕур, остуол “каталино”, дуобат, “квиксо” оонньууларыгар, “Туох, ханна, хаһан?” өйү тургутар биктэриинэҕэ, эр дьоҥҥо голбол, дьахталларга дартс көрүҥнэригэр буоллулар. Бастакы күн истиэндэнэн, быыстапканан бэйэни билиһиннэрииттэн саҕаламмыта, ырыа-тойук, фольклор, хоһоонунан дьүһүйүүгэ куонкурус ыытыллыбыта. Манна кыттааччылар араас талааннарын сөҕө көрдүбүт. Дьоро күҥҥэ ыалдьыттарга анаан тэриллибит сандалы остуолга олорон ырыа-тойук дьиэрэйдэ.
Дьокуускайтан кэлэн Валентин Суздалов, Алена Васильева култуураҕа, Роман Николаев, Константин Шишигин успуорка судьуйалаатылар.
Бэйэни билиһиннэриигэ Мэҥэ Хаҥалас бастакы, Уус Алдан иккис, Таатта үһүс, айар дьоҕуру көрүүгэ Уус Алдан бастакы, Мэҥэ Хаҥалас иккис, Чурапчы үһүс, “Туох, ханна, хаһан?” өй оонньуутугар Чурапчы бастакы, Мэҥэ Хаҥалас иккис, Амма үһүс буолары ситистилэр.
Дуобат, “каталино”, “квиксо” көрүҥнэргэ Мэҥэ Хаҥалас улууһун хамаандата бастаата, Уус Алдан иккис, Таатта уонна Амма хамаандалара 3-с уонна 4-с миэстэлэри үллэһиннилэр. Голболга Чурапчы бастакы, Мэҥэ Хаҥалас иккис, Уус Алдан үһүс миэстэ буоллулар. Дартс көрүҥҥэ Евгений Птицын судьуйалаата. Бу кэрэ аҥардар икки ардыларыгар ыытыллыбыт күрэхтэһиигэ Уус Алдан бастакы, Амма иккис, Мэҥэ Хаҥалас үһүс миэстэлэри ыллылар.
Уопсай түмүккэ Мэҥэ Хаҥалас улууһа бастакы, Уус Алдан иккис, Чурапчы үһүс миэстэлэри хааччыннылар. Хамаандалар дипломнарынан, харчынан уонна Туоһу суруктарынан наҕараадаланнылар. Бэстибээл дэгиттэр талааннаах кыттыылаахтара тэрийээччилэргэ махтанан тарҕастылар.
Игорь Захаров, Игорь Попов, Василий Алексеев, Татьяна Цыденжапова, Виктория Христофорова, Яна Стручкова кыттааччылардаах Мэҥэ Хаҥалас улууһун хамаандата бастакы миэстэ буолан, салгыы өрөспүүбүлүкэтээҕи инклюзивнай бэстибээлгэ кыттар чиэскэ тигистэ.
Мэҥэ Хаҥалас улууһугар көрбөттөр уопсастыбаларын бэрэссэдээтэлэ Иван Семенов Илин эҥэр улуустар икки ардыларыгар ыытыллыбыт инклюзивнай бэстибээли тэрийэргэ күүс-көмө буолбуттарыгар улууспут дьаһалтатыгар, култуура управлениетыгар уонна Ф.Г.Охлопков аатынан орто оскуола дириэктэригэр Андрей Захаровка, оскуола бары үлэһиттэригэр махталын тиэртэ.
Илин эҥэрдээҕи култуура уонна успуорт көрүҥнэригэр инклюзивнай бэстибээлгэ кыайыылааҕынан тахсыбыт улууспут хамаандатын истиҥник эҕэрдэлиибит уонна инникитин да ситиһиилэри баҕарабыт.
Марелла Баишева.
