Ил Тумэн онус ыҥырыылаах пленарнай мунньаҕын сүрүн түмүгүнэн 2025 сылга уонна онтон кэлэр 2026-2027 сс. Саха Өрөспүүбүлүкэтин судаарыстыбаннай бүддьүөтүн кэриҥин түмүктүүр ааҕыыга ылыныы буолла.
Төһө даҕаны бүддьүөт кырыымчыгын үрдүнэн 45% үп-харчы социальнай хайысха, үөрэҕирии, доруобуйа харыстабылын, култуура уонна спорт эйгэлэригэр туһуланыаҕа.
Итини таһынан, 2025 сылга федеральнай субвенция суотугар баһаары сэрэтэр үлэҕэ уонна ойуур баһаардарын умулларыыга эбии үп көрүллүөҕэ.
Үгүс дьону долгутар, Саха Өрөспүүбүлүкэтигэр арыгы бородууксуйатын эбии хааччахтааһын, биирдиилээн атыылааһын усулуобуйатын уонна миэстэтин олохтооһун туһунан сокуоҥҥа уларытыылар киирдилэр.
Бу уларытыылар сүрүннээн «сымыйа кафелар» үлэлэрин хааччахтыаҕа. Ол курдук, саҥа ылыллыбыт сокуон барылынан, элбэх кыбартыыралаах дьиэлэргэ уонна ыаллыы сытар территорияларга арыгыны атыылааһыҥҥа сөптөөх лицензиялаах уопсастыбаннай ас-үөл атыылыыр, эргинэр эбийиэктэригэр ГОСТ 30389-2013 ирдэбилгэ сөп түбэһиннэрэн арыгы бары бородууксуйатын атыыта күнүс 12.00 чаастан түүн 23.00 чааска диэри хааччахтаныаҕа. Бу уларыйыылар үүнэр сыл кулун тутар 1 күнүттэн олоххо киириэхтэрэ.
Өссө биир улахан суолталаах быһаарыынан «Тыа хаһаайыстыбатын оҥорон таһаарыыны өйүүргэ Саха Өрөспүүбүлүкэтин муниципальнай оройуоннарын уонна куораттааҕы уокуруктарын олохтоох салайыныыга уорганнарыгар судаарыстыба кэккэ боломуочуйаларын сүктэрэр туһунан» сокуоҥҥа уларытыылары киллэрии буолла.
Бу хардыы, ынах сүөһүнү, сылгыны, табаны иитиигэ, оҕуруот аһын, хортуоппуйу, бурдугу үүннэриини сайыннарыыга олохтоох оҥорон таһаарааччыларга төһүү күүс буолуоҕа.
Кылгастык сырдаттахха, бүгүҥҥү пленарнай мунньах түмүктэрэ манныктар.
Нэһилиэнньэ олоҕо тупсарыгар, Өрөспүүбүлүкэбит сайдарыгар бүгүн киирбит сокуоннар уонна уларыйыылар туһалаах буолуохтара диэн эрэнэбин!