Бүгүн Арассыыйа үрдүнэн Аҕа дойду Дьоруойдарын күнэ бэлиэтэнэр.
Бу бэлиэ күн Саха Өрөспүүбүлүкэтин Ил Дархана Айсен Николаев Мэҥэ Хаҥалас улууһун Баатара нэһилиэгэр сахаттан бастакынан Сэбиэскэй Сойуус Дьоруойун үрдүк аатын ылбыт Федор Кузьмич Попов пааматынньыгар тыыннаах сибэкки дьөрбөтүн уурда.
Дьоруой Ф.К.Попов аатын сүгэр Баатара орто оскуолатын үөрэнээччилэрин, кадет кылаастарын иитиллээччилэрин итиэннэ бүгүҥҥү ураты күн манна үгэс быһыытынан ыытыллар «Хаардаах барс» байыаннай-спортивнай оонньуу улуустааҕы түһүмэҕин кыттыылаахтарын Ил Дархан Айсен Николаев уонна Арассыыйа Дьоруойа, анал байыаннай дьайыы кыттыылааҕа, «Боотур» этэрээт хамандыыра Александр Колесов эҕэрдэлээтилэр.
— Дьоруойдар күннэригэр саха омугуттан бастакынан Сэбиэскэй Сойуус Дьоруойун аатын ылбыт Федор Кузьмич Попов дойдутугар кэлэн турарбыттан олус үөрэбин уонна долгуйабын, — диэтэ Айсен Сергеевич. – 80 сыл анараа өттүгэр бу Баатара сириттэн дойдутун көмүскүү барбыт эдэркээн уол Днепр өрүһү туораан, уһулуччу хорсун быһыыны көрдөрөн, саха омугуттан бастакынан бу үрдүк ааты ылбыта.
Билигин саха хорсун уолаттара атын омук бэрэстэбиитэллэрин кытта бииргэ дойдубут арҕаа кыраныыссаларыгар буола турар анал байыаннай дьайыыга Арассыыйа туһугар эмиэ дьоруойдуу киирсэ сылдьаллар. Күн бүгүн 4 саха уолаттара Арассыыйа Дьоруойдара буоллулар. Дойдуну көмүскүүр байыаннай эпэрээссийэҕэ саха уолаттара инники күөҥҥэ сылдьалларынан киэн туттабын. Эдэр ыччаттарбыт бүгүн манна буолар байыаннай оонньуу курдук тэрээһиннэргэ кыттаннар өй-санаа, эт-хаан өттүнэн бэлэмнээх, дойдуга бэриниилээх, улуу дойдубут Арассыыйа патриоттара, дьиҥнээх гражданнара буола улааталларыттан үөрэбин. Бүгүҥҥү күрэхтэһиигэ бастыҥтан бастыҥ кыайдын! Ханна да тиийдэргит, дойдугут Дьоруойдарын умнубат буолуҥ, төрөөбүт Сахаҕыт сиригэр, Улуу Арассыыйаҕа бэриниилээх буолуҥ.
Бэйэбит кэрэсп.
