«Ийэбиниин сахалыы ааҕабын» марафон кэрэхсэбиллээхтик саҕаламмыт

Сахалыы ыраастык саҥарыы, сахалыы ааҕыы мөлтөөбүтүн туһунан учууталлар уонна төрөппүттэр кэпсэппиттэрэ ыраатта. Тылбыт тыыннаах буоларыгар тиһиктээх үлэ наадатын таба өйдөөн, Мэҥэ Хаҥалас улууһун үөрэҕириитин управлениета, М.И.Брызгалова аатынан Майатааҕы оҕо бибилэтиэкэтэ, улуустааҕы эр дьон уонна дьахталлар сүбэлэрэ, «Ийэ тыл» түмсүү көҕүлээһиннэринэн кулун тутар 1-21 күннэригэр ийэ уонна оҕо сахалыы айымньылары кэрэхсээн ааҕалларыгар туһуламмыт «Ийэбиниин сахалыы ааҕабын» марафон ыытыллар.

Марафон диэн уһун кэмнээх дьайыы, онтон үөрүйэх үөскүүр болдьоҕо 21 хонук диэн учуонайдар бэлиэтииллэр. Онон ааҕыы салгыы үөрүйэх буоларын ситиһиллиэхтээх.

Бүгүн  «Ийэбиниин сахалыы ааҕабын» марафон хаамыытын билсэр сыаллаах улуустааҕы үөрэх управлениетын сүрүннүүр исписэлииһэ Татьяна Дмитриеваны кытта оскуолаларга сырыттыбыт. И.Г.Игнатьев аатынан Хара спортивнай орто оскуолатыгар бибилэтиэкэр Октябрина Дмитриева марафон чэрчитинэн кыттааччылары мунньан, аһаҕас кэпсэтии тэрийбит. Нэһилиэк баһылыга Дария Назарова марафону өйүүрүн, биһириирин биллэрэн көрсүһүүгэ кытта кэлбит. Саха тыла сайдарыгар, төрөөбүт төрүт тылбытын харыстыырга төрөппүт улахан суолталаах. Сахалыы тылынан ааҕыы, саха омук быһыытынан сайдарбытыгар төһүү күүс буолар диэн бэлиэтээн эттэ.

Марафон кыттыылаахтара Лева, Саргылана Прибылыхтар 15 туомнаах саха тылын быһаарыылаах улахан тылдьытын электроннай көрүҥүн ааҕыыларыгар туһанан, элбэх саҥа тылы билбиттэр.

С.3.Борисов аатынан Тыыллыма орто оскуолатыгар алын кылаас учууталларын методическэй холбоһугун көҕүлээһининэн 2005 сылтан ийэ тыл эйгэтин кэҥэтэр сыаллаах маныаха майгынныыр  бырайыактары үлэлэтэн кэлбиттэр. Оҕо саадын иитээччилэрин кытта ситимнээхтик үлэлииллэр эбит. Алын кылаас учуутала Марфа Назарова, «Күнчээн» уһуйаан иитээччитэ Анастасия Васильева, ааҕыыга оҕолор үөрүүнэн кыттыстылар диэн кэпсээтилэр. Бибилэтиэкэр, учуутал Вилюяна Борисова марафоҥҥа 30 ыалы хаппыт. Куйаар куодунан тылдьыты арыйарга, төлөпүөҥҥэ сахалыы сириип хачайдаатахха арыллар диэн төрөппүттэргэ, оҕолорго өйдөтүү үлэтин ыытыахха наадатын эттэ. Сахалыы ылбаҕайдык саҥара, ааҕа эрэ буолбакка, сахалыы буукубалары туттан сөпкө суруйа үөрэниэҕиҥ диэн ыҥырда.

Марафон билиҥҥи туругунан 600 ыалы хаппыт, сорох оскуолаларга кылаас 100 бырыһыан кыттарын ситиспиттэр. Хас биирдии дьиэ кэргэҥҥэ ийэттэн олус элбэх тутулуктаах, саҥарар тылбыт мээнэҕэ «ийэ тыл» диэн этиллибэт. Семен Данилов «Саха саҥата» диэн хоһоонугар:

Эппэр ийэм үүтүн кытта

Иҥмит эбит, быһыыта,

Кустук өҥнөөх,

Кымыс сыттаах

Сахам мандар саҥата, — хоһооҥҥо этиллэрин курдук, ийэ оҕоҕо элбэҕи биэрэр. Сахабыт тылын сүөгэйин, сүмэһинин оҕолорбутугар хото бэрсиэҕиҥ. Дьиэбит иһигэр сахалыы тыыны, эйгэни тэрийиэҕиҥ.

Марафон бэрт кэрэхсэбиллээхтик саҕаламмыт, түмүгэ кулун тутар 27 күнүгэр Майа сэлиэнньэтигэр Д.Ф.Ходулов аатынан култуура киинигэр үөрүүлээх быһыыга-майгыга тэриллиэҕэ. Кыттыбыт оҕолорго «Ийэбиниин сахалыы ааҕабын» өйдөбүнньүк значок, дьиэ кэргэттэргэ туоһу суруктар туттарыллыахтара.

 

Елизавета Неустроева.