Ахсынньы ый Билгэ Хаан ыйа, билии айыыта, киһи аймах өйүн сытыылыыр, сайыннарар кэмэ.
Томороон кыһыммыт тымныытынан аргыйан кэлбитин биллэрэр, салгыммыт хойдон, туманынан бүрүйэн, былытырар, хаардыыр, күммүтүн хаххалыыр кэмигэр үгүс киһи ахсыыр-сылааргыыр, уута мунньустан көлбөҕүрэр. Бу туруктан ыраастанаары күн муҥутаан кылгыыр – ахсынньы 21 күнүгэр Сахабыт сирин үрдүнэн тэҥҥэ, ол иһигэр, Майаҕа “Дьол түһүлгэтэ” уопсастыбаннай кииҥҥэ алгыс көтөҕүллүүтүн сиэрэ-туома ыытылынна.
Алгысчыттар кэлбит дьону кытта атах тэпсэн олорон ааһан эрэр сылга махтанан, үүнэр Иэйэхсит сылын бөҕө туруктаах көрсөргө бэлэмнээн истиҥ сэһэргэһиигэ ыҥырдылар. “Сырдык Айыы сыдьаайа” түмсүү салайааччыта, алгысчыта Анна Климентова Аан дойдуну айбыт Үрүҥ Аар Айыы Тойон баарын, Үрүҥ Айыы Таҥара Күн күбэй Хотуннаах, ол кэнниттэн алта Ытык Хааннар олороллорун, икки атахтаах хайдах айыллан Орто дойдуга кэлэрин, дьылҕата оҥоһуллара хааммытыттан силистээҕин, өбүгэлэрбит хайдах олорон кэлбиттэриттэн тутулуктааҕын, киһи дьылҕатыгар дьайар күүстэри быһааран биэрдэ. Арчыһыт Лидия Андреева-Ил Иитэ сахалыы төрүт дорҕооннорбут суолталарын сырдатта, дорҕооннору таһаарарга дьарыктаата.
Түсчүт Зиновий Игнатьев, саха дьонун сиэринэн, аал уотун оттон арыылаах алаадьынан айах тутта, бар дьонун дьоллоох олоҕун туһугар Үрдүк Айыылартан көрдөһөн алгыс көтөхтө. Кини дэйбиир суолтатын кэпсээтэ, ыраастана сылдьарга сүбэлээтэ, харысхаллаах буоларга күрүөбүтүн бөҕөргөттө, бэйэ-бэйэҕэ үтүөнү баҕаран куйаар устун ыраас санаабытын ыыта сылдьарга сүбэлээтэ. Бу күн Моорук Суолатыттан Николай Окороков, Хорообуттан анал байыаннай дьайыы кыттыылааҕа Дмитрий Иванов кэргэниниин, ону сэргэ, олохтоох дьон ыраастанан-арчыланан, санааларын бөҕөргөтөн, алгыс ылан махтанан тарҕастылар.
Үүнэр сылга үөрүүбүт үксээтин, эйэлээх олохпут эргийдин, тулабыт сырдыгынан сыдьаайдын, алаһа дьиэбит сылаас эркиннэннин, ыччат дьоммут ыал буолан хас биирдии дьиэҕэ оҕо саҥата чугдаардын.
Марелла Баишева.
